SHILLONG:
Ka Khun Hynñiewtrep National Awakening Movement (KHNAM) ka la buh ka jingkyrpad ïa ka sorkar jylla ban pynduh noh ïa ka jingpynlong ïa ka personal interview na ka bynta ka kam ka ba hap ha ka group B,C bad D.
Haba kren sha ki lad pathai khubor ha ka 21 tarik Lber, u nongïalam ka KHNAM u Bah Thomas Passah u la ong ka seng ka la dep ban leit aiti ïa ka dorkhat sha ka sorkar MDA-I ban dawa halor ban pynduh noh ïa ka personal interview ha ka ba ïa dei bad ka group B,C bad D.
“Kum ba ka long mynta ka Sorkar India ka la dep ban pynduh ïa kane khnang ban lah ban pynduh pyndap ïa ka jingthungkam da ka lynti bym dei bad kane ka interview ka pynsep ei ïa ka pla pisa sorkar bad ïa ka por ki ophiser”, u la ong .
“Naduh u snem 2016, ka sorkar India ka la weng ïa ka ne bad 23 ki jylla ki la dep ban weng, bad ngi la ai ka dorkhas ban kyntu ban weng noh ïa kane khnang ban ym don ka jingshah shiliang”, u la bynrap.
U Bah Passah u la ong ruh “Hadien 50 snem ka jylla ka la donkam ruh ïa ka recruitment Policy, ïa ka SOP ban buh por halor ka jingpynbna, ka written test, halor ka jingpynbna ïa ka result bad ban thungkam noh kum ba ka long mynta kane ka rukom thungkam kam long ka ba beit”.
U la bynrap shuh shuh ba “U Myntri rangbah ka jylla,u dei ban ai ka shithi ha ka ba ïadei ka jubab halor ki dorkhas jong ngi, bad ngi khmied lynti ba ka dang ïaid ka ne ka dorbar ki kwah ban don ka jingïatai halor kine ki mat ki ba ktah ïa ki khun samla jong ngi”.
U Bah Passah u la kdew ruh ba “Kawei ka mat ka long halor ka jingpynhap jong ka sorkar jylla ïa ka state Reservation policy ha ka Academic Reservation, kumba ngi la lap na ka RTI 2013-15 bun ki jaka pule ba la bhah da ka sorkar ka pynsepei kai da ki khynnah pule namar ba kim lah pyndep ïa ka jingpule jong ki”.
U la bynrap shuh shuh ba “Ka ba donkam hi ka long ba ka sorkar jylla ka dei ban ai ïa ka bhah pule kat kum ka merit list khnang ba ki ba donhok kin ïoh ban pule bad kan ym don ka jingpynleh nohei”.
