SHILLONG:
Ka Khasi Students’ Union (KSU) ka Lai Hima Zone, kynthup ïa ka Phlangdiloin,Umdohlun, Warsan Lyngdoh) ha ryngkat ki Khlieh Synshar Shnong, ki la ïakynduh ïa u Myntri ka tnad Community & Rural Development (C&RD) u Abu Taher Mondal ban dawa pynkha ïa ka C&RD Block ha ki thaiñ Wahkaji-Umdohlun.
Katkum ka dorkhas bala soi da u President ka seng u Bah Shemphang Nonglang bad u General Secretary u Bah Dusterwell K Lyngdoh lem bad ki Khlieh Nongsynshar Shnong, la kdew ba ki don haduh 44 tylli ki Shnong jong kane ka thaiñ South West Khasi Hills, ki la tyrwa ban pynhap hapoh kane ka Block ba dawa ban pynkha thymmai ïa ka C&RD ha kine ki thaiñ.
Katkum ka jingpynpaw ha ka dorkhas, ka dong Phlangdiloin, Umdohlun bad Warsan Lyngdoh ka dei kaba sahdien bha bad ki paidbah ki hap ban ïaid haduh 30-60 km sha Mawkyrwat, ka District Headuarter ka South West Khasi Hills haba donkam ban leit sha Block.
Kila ong ruh ba ki don ki shnong ka thaiñ kiba hap hapoh ka Ranikor Block, ki paidbah kin hap ban ïaid haduh lai kynta da ka kjat ban poi sha Ranikor.
Kane ka kynhun kala ong ba ka jingjngai na ka thaiñ sha Mawkyrwat bad Ranikor bad ka jingsniew jong ka surok bad kiwei kiwei ki lad pynïasoh, ka dei ka daw bah kaba khang lynti ïa ka jingwan ka roi ka par bad kumta ka long kaba donkam ban wanrah ïa ka jingshakri jong ka Sorkar shajan jong u paidbah.
Katkum ka dorkhas la pynpaw ba ka Community & Rural Development Block ka dei tang kawei ka lynti kaba lah ban wanrah ïa ka jingïajan hapdeng ka sorkar bad u paidbah. “Kumba ka Sorkar MDA ka ju kam ba ka dei ka Sorkar u paidbah, ngi phah ïa kane ka khubor sha ka Sorkar ba kan sngap lem ïa ka jingeh jong ngi khlem da buh kyndon”, la kdew ka seng ha ka dorkhas.
Ka Khasi Students’ Union (KSU) ka Lai Hima Zone, kynthup ïa ka Phlangdiloin,Umdohlun, Warsan Lyngdoh) ha ryngkat ki Khlieh Synshar Shnong, ki don ka jingkyrmen kaba skhem ba ka Sorkar Meghalaya Democratic Alliance (MDA)-2 kan pynurlong ïa kane kumba ka kam ba kadei ka Sorkar u paidbah.
Na ka liang u Myntri ka tnad C&RD u Abu Taher Mondal, u la ïathuh ba ka la don ka jingïakynduh hapdeng ka KSU Lai Hima Zone ryngkat ki khlieh nongsynshar shnong halor ka jingpynkha thymmai shuh ïa kane ka tnad C&RD hapoh kitei ki thaiñ.
U A.T Mondal u la ïathuh ba ka jingpynkha thymmai ïa ki C&RD Block ka dei ban ïai bteng katkum ka jingdawa ki paidbah khnang ban pynsuk ïa ka jingpyntreikam ïa kino kino ki skhim lane kino kino ki jingïoh myntoi jong ki paidbah na ka sorkar. U la ong ba wat ha ka sorkar kaba la dep ruh ka sorkar MDA ka la dep ban pynkha haduh 9 tylli ki C&RD Block bad u la kyrmen ba kine baroh kin treikam.
“Ïa mynta ngin peit shwa la kine ki C&RD Block kin treikam bha neem bad hadien kata ngin sa pyrkhat ban pynkha bun biang ïa kine ki Block bad ngin sa kylli na ki nongpeit jong ki District lane ki DC halor ka kaiphod ha kaba ïadei bad ka jingdonkam ban pynkha ïa ki Block”, la ong u Mondal
Ha kaba ïadei bad ka jingkylli ba don ki nongshong shnong ki hap ban ïaid da ki bun kynta ban poi sha kine ki Block tang na ka bynta kawei ka kam kaba rit eh, u AT Mondal u la ong, “Halor kane ba don ki nongshnong shnong kiba hap ïaid 3 kynta, kumta na ka liang ka sorkar kan bthah ïa ki heh ophisar ban ai ka kaiphod khnang ba ka sorkar kan ïoh ki lad ki lynti halor kane”.
Ha kaba kylli halor ka tnad bording, u Myntri ka tnad Bording u Abu Taher Mondal u la ong ba ka sorkar jylla kan sa ai da ka Affidavit katkum ka jingbthah ka ïingkashari ha kaba ïadei bad ka jingeh ha kaba ïadei bad ka bording hapoh ka jylla. U la ong ba ïa mynta ym pat lah ban ïathuh hynrei yn sa ïathuh hadien ba la dep ban ujor da ka Affidavit.
Haba ïakren sha ki lad pathai khubor u A.T Mondal u la ong ba ka sorkar kam lah ban shu pynkiew ïa ka khajna kumba la buh ïa ka dor da ka Regulatory Commissions.
“Ngi la dep buh ka jingkyrpad sha ka Regulatory Commission bad ka shong pat ha ka rai jong ka ïingkashari ban shim ïa ka rai bad ïa kane ruh ka shong ha ka Affidavit jong ngi”, la ong u A.T Mondal
Lah ban kdew ba ka jingeh ba ki paidbah nongshong shnong hapoh ka jylla ka long kaba syrtok shaba palat bad ka jingpynlip bording hapoh ka jylla ka la ktah shikatdei eh ïa ki nongshong shnong ka jylla.
