NONGSTOIÑ:
Hadien ba kala don ka jingshah rah noh ki tiar bala mang na ka bynta ka MCH Hospital ha Nongstoiñ ka Seng Khasi Student Union (KSU) West Khasi Hills District, mynta ka sngi ka 28 tarik Jymmang kala leit ban jurip ia ka Maternity & Child Hospital bad leit kynduh ruh ia ki ophisar ka DM&HO ban iakren halor ka jingshah rah kitei ki tiar sha kawei pat ka Hospital ha kawei ka District.
Watla ki dkhot jong ka Seng kim shymla ioh iakynduh ia ka DM&HO hynrei lyngba ka phone kila ioh ban iakren ha kaba la lah ruh ban pyntikna ba ia kitei ki tiar bala mang ban buh ha MCH Nongstoiñ la dep ban rah bad pynkynriah noh sha kawei ka Hospital ha kawei pat ka District.
Ha kaba iadei bad kane ka bynta na ka liang jong ka Seng KSU kala pynpaw ia ka jingsngewsih bas pyrshah ia ka jingleh donbor ka sorkar bad ka Seng kala dawa na ka sorkar ba kadei ban wanrah bad pynbiang noh ia ki tiar ba dei hok ban don ha ka MCH Nongstoiñ bad ruh ban plie noh ia katei ka Hospital khnang ba kan long ka jingmyntoi ia ki paidbah.
Lah ban kdew hangne ba ha u bnai Naiwieng jong u snem 2022 ka tnad ka koit ka khiah kala mang pisa ban thied ia ki tiar ba donkam ha katei ka Hospital hynrei kaba sngewsih pat ka long ba ha 23 tarik u Jymmang 2023 ar tylli ki trok kila wan ïeng ha katei ka Hospital ban sei noh ia ki tiar ki tar ia kaba la lah ruh ban pyntikna ba ia kitei ki tiar la rah bad pynkit noh sha ka Civil Hospital Mawkyrwat.
