SHILLONG:
Ka North East Students’ Organisation (NESO) ka la dawa ban weng noh pura ïa ka aiñ Armed Forces (Special Powers) Act, 1958 ba la ju tip kum ka AFSPA bad ban pyntreikam noh ïa ka Inner Line Permit ne ka ILP ha baroh kawei ka Thaiñ Shatei Lam Mihngi, na ka bynta ban ïada bad ka bha ka miat jong ki paidbah trai muluk.
Kane ka synjuk jong ki phra tylli ki seng samla pule ka la ïalap ban weng noh ïa ka AFSPA bad ban pyntreikam ïa ka Inner Line Permit ha baroh ki jylla ka Thaiñ Shatei Lam Mihngi.
U Bah Samuel B Jyrwa, shongknor ka NESO u la ïathuh ki paidbah ka thaiñ ki la shah thombor namar ka jingdon ka aiñ AFSPA, kaba kynthup ïa ka jingshah pynïap ki 13 ngut ki nongbylla sngi tang namar ka jingithuh bakla ha Mon District ka Nagaland, ha u Nohprah 2021.
Na ka liang jong ka tnad pohïing ka sorkar pdeng ka la pynduna ïa ki thaiñ kiba hap hapoh ka AFSPA ha Nagaland, Assam bad Manipur, hynrei kane ka aiñ ka dangneh ha ki katto katne ki thaiñ.
Ka AFSPA ka ai bor ïa ki shipai bad kiwei ki shipai ka sorkar pdeng ban hiar khynra bad thwet, kem ïano ïano khlem jingpyntip lane phah kem bad ki seng saiñ pyrthei bad sengbhalang ki la ñiew ïa ka kum ka aiñ ïakjakor.
U Bah Samuel u la ban jur ba ka jingpyntreikam ïa ka ILP ha baroh ki jylla ka Thaiñ Shatei Lam Mihngi ka long kaba donkam na ka bynta ka jingshngaiñ bad ka bha ka miat jong ki paidbah trai muluk ka thaiñ.
Ka ILP ka la treikam ha Arunachal Pradesh, Nagaland bad Mizoram bad ha Manipur ha ka 11 tarik u Nohprah, 2019. La shah ïa ki nongshongshnong ka India ban rung ha ki thaiñ ba pyntreikam ïa ka ILP da ka bor bad ïa ki kam ba ki thmu ban leh ki hap ban da ïoh jingbit da ka jingthoh na ki bor ba dei peit.
Ka thong kaba kongsan eh jong ka ILP ka long ban khanglad ïa ka jingbuhai shnong jong kiwei pat ki briew na India ha ki jylla bad ban ïada ïa ki jaka puta, ïoh kam ïoh jam bad kiwei ki jingdonkam jong ki trai shnong.
U Bah Jyrwa u la dawa ruh ba ïa ka Common University Entrance Test (CUET) ym dei ban pynlong ha ki jylla ka Thaiñ Shatei Lam Mihngi namar ki samla pule ka thaiñ kim ïoh kajuh ka kyrdan jingtbit ban pule ha ki kyrdan ba kham halor, ki jingdonkam bad ki jingkyrshan kum kiwei ki bynta jong ka ri.
U nongai buit ka NESO, u Samujjal Bhattacharya ruh u la dawa ban ithuh bad pynphai kylla ïa ki briew na Bangladesh kiba wan poi wir ha ka thaiñ bad pyrshah ban pyntreikam ïa ka Citizenship (Amendment) Act (CAA).
