SHILLONG, 28 Jymmang: Ka United Democratic Party (UDP), ha ka 26 tarik Jymmang ka la dawa ïa ka sorkar Meghalaya Democratic Alliance (2.0) ban pyntreikam ïaka roster system nangne shakhmat bad ruh ka jingdonkam ban pynbeit thymmai ïaka Reservation Policy lane ka bhah thungkam thungjam hapoh ka jylla.
Haba ïakren sha ki lad pathai khubor, u President ka UDP u Bah Metbah Lyngdoh ba katkum ka jingsngewthuh, ka jingpyntreikam ïaka Roster System kadei ban long nangne shakhmat bad ym dei ban shim ïa kino kino ki rekod kiba la buh thikna. Shuh shuh u la ong bad ym shym la don ruh ka Roster rejister kaba la buh ha baroh kine ki snem kiba la leit. Kumta kan ym long kaba iahap ïano ïano ruh ban kam ba ki rekod kiba don mynta ki long kiba dei.
U la ong ba kane ka mat ka long kadei kaba ktah bha, kumta la donkam bha ban ïatai sani ha ka rynsan kaba kyrpang ha kaba yn lah ban pynbeit ia knae ka jingeh baroh. “Ka sorkar kala thaw ïaka Committee halor ka Reservation Roster kaban khlieh da ka Myntri Sorkar bad na ka liang ka UDP kan sa phah ïa uwei na ki MLA jong ka ban mihkhmat iaka seng ban pynsngew ïa ki jingsngewkhia halor ki mat kaba ïadei bad ka roster system. Kan dei beit thik tang halor ka roster system”
U la ïathuh ruh “Hashwa ba ka sorkar jylla kan lum ïa ka jingïalang ban ai jingpynshai ha ka 17 bad 19 tarik u Jymmang, 2023, na ka liang ka party ka la shong jingïalang arsien bad mynta ngi la rai ba kan long kaba bha shibun bad kaba shong nongrim ba ka sorkar kan pyntreikam beit ïaka Roster System nangne shakhmat.
U Bah Metbah u la ong ba ha ka por ba long ka jingïalang kaba la lum da u Myntri Rangbah bad ki MLA jong ka sorkar MDA (2.0) na ka liang ka party UDP ka la rah ïa ki katto katne ki mat bad mynta ka la donkam biang ïa ki kum ki myntri hapoh ka sorkar MDA ban pynsgew bad pan ruh jingpynshai ha kaba ïadei bad ka Reservation Policy lane ka hah thungkam thungjam bad ka jingpyntreikam ïaka Roster System nangne shakhmat.
Shuh shuh u Bah Metbah u la ong ba ïa kane ka mat ruh kamdei shuh kaba dang mynta hynrei wat ha ka Manifesto ka party kan long ban pynbeit thymmai ïa kane ka Reservation Policy. U la ong ba ïa mynta nyngkong dei ban sngewthuh shwa ïa ka Roster System. “Ka roster system ka long ha kaba ïadei bad ka jingpyntreikam ïaka Reservation Policy kaba mynta. Mynta, nga kwah ban kren da kaba shai, ba kum ka seng ngi la kdew shai bad ym don ruh kiba lah ban kyntait ba ha ka Manifesto jong ka seng la kdew shai ïa ka jingdonkam ban pynbeit thymmai ïaka Reservation Policy. Ngin sa sdang ïa kane ruh ha ka rynsan kaba dei, namar ngi ruh ngi dei kiba don bynta lang bad ka sorkar, ngin ïakren bad ka sorkar bad ban shimkhia ïa kane ka mat ïa kaei kaba donkam ban pynbeit thymmai ha ka Reservation Rolicy.
Ïa katei u la kren ha ka jingïalang kaba la lum da u President ka UDP u Bah Metbah Lyngdoh ha ka jingdon lang ki MLA bad ki nongïalam jong ka party.
