SHILLONG:
Hadien ba kawei ka longkmie, ka Kong Stefani Lyngdoh Nonglait, ka la khlad kyndit noh ha ka 14 tarik Jylliew, na ka liang ki bahaïing hasem jong ka Kong Stefani ki don ka jingsuba jur ba ïa kane ka longkmie la pynïap da u kurim jong ka da kaba u la dkhat jubor ïa ka mynsiem jong katei ka longkmie kaba don arngut ki khun shynrang bad u khyllung ba dang pun 2bnai ha kpoh.
Haba kren sha ki lad pathai khubor mynta ka sngi ka 16 tarik u Jylliew kaba dei ruh ka sngi leit on tep ïa ka longkmie ba la shah pynïap, na ka liang ki bahaïing hasem jong ka Kong Stefani , ryngkat u Bakha bad ka para trai ka Kong Amanda Lyngdoh Nonglait ki la ong ba ka daw ba ki suba sniew ïa une u kurim jong ka kadei namar ba u kylla ktien ha ka rukom ïathuh jong u ha ka por ba u lap ïa ka met jong ka lok bad kam ïahap pat bad ka rukom ïathuh jong u sha ki pulit ynda la wanpoi na ka Crime Branch.
Na ka liang ka ïing ka sem jong ka Kong Stefani, ki la buh ïa ka jingdawa ba ki dei ban ïoh ïa ka jingbishar kaba hok katkum ka aiñ khnang ba kaba rieh sha lyndet jong kane ka jingjia kan shai sha ki kum ka ïing ka sem.
Ïa ka met kaba sah jong ka longkmie, la leit tep donburom mynta ka sngi ka 16 tarik Jylliew ha u lum jingtep ka Balang Presbyterian ha Lawmali.
Ha kane ka sngi kaba dei ruh ka sien kaba khatduh ïa kiba ieid ba thoiñ ban peit ïa kane ka longkmie, la wan sakhi khatduh ha kane ka sngi da u kñi jong ka kur Lyndoh Nonglait bad haba u ai jingkren khatduh u la ïathuh ïa ka jingshem jong u ha ka jingïakren bad u kurim jong ka Kong Stefani Lyngdoh ha ka sngi ba don katei ka jingjia bad u la pynpaw ïa ka jinglynngoh namar ba kam ïahap satia bad ka jingïathuh jong u sha ki pulit.
