SHILLONG:
Ka dorbar shnong Diengpasoh pyllun ha ka 3 tarik Ïaïong ka la dawa ba u President ka Hynñiewtrep Achik National Movement (HANM) ka Shiliang Umkhen Circle, u Bah Lamphrang Kharbani, u dei ban wan panmap lane u dei ban pynshai halor ka jingkynnoh jong u ba u sordar ka shnong u kheiñ nongwei ïa ki Khasi Pnar da kaba kynnoh ba u kyntait ban ai NOC ïa kiba kwah thied jaka.
Ki nongïalam shnong ki la pynshai paidbah halor ki jingkynthoh kiba la mih ha ki lad pathai khubor ha ka 28 tarik Lber, kiba la long ka jingpynthoh bria ïa ka dorbar shnong. Ki nongïalam ka shnong ki la ïathuh ruh ba ki la ai por kumba shi taïew eiei ïa ki nongïalam ka HANM ban wan mih hapoh shnong ban ïakynduh ïa ki, hynrei kim shym la wan.
Haba kren halor ka jingkynnoh ba u sordar shnong Diengpasoh u leh donbor, ki nongïalam shnong ki la ong ba u sordar shnong um long kham ha khlieh ïa ka dorbar shnong bad ki la ong ruh ba lada u sordar shnong u ïaid palat ïa kaei ba la rai da ka dorbar, kam donkam ba ki briew ba nabar kin wan ban tuklar namar ba ki paidbah ka shnong ki la tip ban leh ïa kaba donkam.
Ha kaba ïadei bad ka jingkynthoh ba u sordar shnong u kheiñ nongwei ïa ki Khasi Pnar, ki nongïalam ka shnong ki la ong ba la dei ban sngewthuh ïa ka jingmut ka ktien “nongwei”, kata “nong” ka mut shnong bad “wei” ka mut ba wan na kiwei ki shnong. Kumta nongwei kamut kiba wan na kiwei ki shnong. Ki la ong ruh ba ka dorbar ka la mana ha ka ban pyndonkam ïa ka ktien “nongwei” namar ka wanrah ïa ka jingsngew pher hapdeng ki paidbah ka shnong.
Halor ka rukom longtrai bad ka rukom bat khyndew ha Diengpasoh, ki nongïalam shnong ki la ong ba kumba 80 per cent ka Diengpasoh ka dei ka ri raid bad kumba 20 per cent eiei ka dei ki jaka shimet. Kumta ha kaba ïadei bad ka ïadie ïathied, ka dorbar shnong kam pat shah ban die ïa ki jaka raid shabar shnong, hynrei ïa ki jaka shimet ki briew ki lah ban ïadie ïathied bad kiba nabar shnong bad ïa kane la dei ban pyntip sha ki nongkit kam shnong lym kumta ka dorbar shnong kan ym ithuh ïa kata ka jingïadie ïathied.
Halor ka jingkynthoh ba u sordar um ai NOC ïa kito kiba ïadie ïathied da ki akar akar ha Diengpasoh, ki nongïalam shnong ki la ong ba kiba kynnoh ïa kane ki la dei ban wanrah ïa kita ki briew kiba la ïadie ïathied ïa kita ki jaka ryngkat ki kot ki sla kiba biang, namar ba ka shnong ka kwah ban ïoh ka jingpynshai halor kane ka jingkynnoh. Ki nongïalam shnong ki la banjur ba ka jingïadie ïathied khlem ka jingtip ka shnong, ka shnong kan ym kheiñ ba ka long aiñ, kaba dei ruh ka rai jong ka dorbar.
Ki nongïalam shnong ki la kynthoh ruh ïa ka jingleh ka HANM da kaba ong ba kiwei ki seng bhalang lada ki shem ba don ka jingshong pher ha ka jingpynïaid shnong pynïaid thaw, ki ju wan ïakynduh bad ban ïasyllok bad ki nongïalam shnong bad ha kaba kut kiei kiei baroh ki kut ha kaba bha. Kumta ka dorbar shnong ka pynrem jur ïa ka jingleh ka HANM.
Ha kawei pat ka liang, u deputy sordar ka Diengpasoh pyllun u Bah Seibor Sana u la ong ba ka jingbym shah ka dorbar shnong ban ïadie ïathied ïa ki jaka raid ka long namar ba ka shnong ka dang pyrshang ban ïasam ïa ka ri raid sha kito kiba dei ban ïoh.
U la bynrap ruh ba lada u nongïalam ka seng HANM u ïeng shisha ha ka nongrim ieid jaidbynriew balei pat u kloi ban kdew kti ïa ki para jaidbynriew bad ban thad madan ïa ka burom jong ka shnong.
