SHILLONG:
U President ka Meghalaya Pradesh Congress Committee (MPCC), u Bah Vincent Pala u la pynrem jur ïa ka jingshah siat ïap ki san ngut ki rangbah Khasi ba shong ba sah ha Mukroh, West Jaiñtia Hills bad u la dawa na ka sorkar ba ka dei ban ai kam ai jam ïa kito ki bahaïing jong kito kiba ïap bad na ka bynta kito kiba mynsaw, ‘ka sorkar ka dei ban phah sumar ei khnang ban lait na ka jingdap ram’.
Haba kren bad ki katto katne ki nongthoh khubor, U Bah Pala u la ong ba kane ka jingjia kam dei shuh ka sien kaba nyngkong hynrei ka la jia ha ka snem 2002 kumba 7 ngut ki la duh ei ïa ka jingim ha kane hi ka shnong. U la ong ba ka sorkar Assam ka dei ban ai da ka hukum kaba tyngeh ïa ki briew jong ka kiba shong ha ki jaka khappud ba ym dei ban ai suloi ïa ki.
U la dawa ruh ïa ka jingtohkit da ka Central Agency lyngba ka Central Bureau of Investigation (CBI) lane da kiwei. U la ong ba u bnai Naitung-Nailar ruh, ‘ka dang shu dep jia bad lada ka sorkar ka shim khia, ka la dei ban ïakren ïa ki Rangbah Shnong, hynrei kam shym la leh ei ei’. U la ong ba kam don ka jingïakren hapdeng ka jylla Assam bad ki trai jong kine ki shnong.
U Bah Vincent u la ong ba mynshuwa ha ka por jong sorkar Congress ka la buh ki pulit ban ïada ïa kine ki briew kiba shong ha kato ka jaka bad ka don ruh ka jingsngewthuh hapdeng ka jylla Assam bad ka Meghalaya. “Hynrei naduh ba la wan kane ka sorkar Meghalaya Democratic Alliance (MDA) ba la ïalam da ka National People’s Party (NPP), la pynslem ïa ka jingïakren hapdeng ka jylla Meghalaya bad Assam bad kane ka pyni ba ka sorkar jylla ka la pheil lut nadong shadong,” la ong u Bah Pala.
U la ong ba kane baroh ka dei ka jingbymlah ka sorkar Meghalaya, bad ka jingthombor ka Assam ka pyni shai ba lada leh katba leh ruh ka biang beit lane ka shah beit.
“Namar ba ka Assam ka i ba ka sorkar Meghalaya ka tlot palat na kane ka daw ka Assam ka rung jubor katba mon bad ki kam ruh kiba jakhlia. Kane ka pyni ba ka sorkar Assam ka pyni bor ïa ka sorkar Meghalaya,” la ong u Bah Pala.
U la ong ba kine ki ar myntri jong ka sorkar Meghalaya bad Assam ki dei ban don ka jingïakren sngewthuh khamtam ha ki jaka khappud, ‘dei ban don ka jingïasngewthuh para briew bad ka rep ka riang ka dei ban ïaid beit. Hynrei ym don kum kata ka jingpynsngewthuh bad teng teng wat ha ki jaka ka jylla Meghalaya, la suh thombor da kane ka sorkar Assam’.
Ha kaba ïadei bad ki kynrum kynram khappud, u Bah Pala u la kynnoh ba ka sorkar Meghalaya kam shim khia ïa kane ka jingeh; ‘lait sa tang ha kito ki jaka ha kaba ki heh sorkar ki thied jaka ba don ki jingïakajia pud’. U la ong ba kane ka pynmih ïa bun ki jingeh ha kaba ka sorkar ka hap ban kit khlieh.
“Kane ka jingïapynbeit pud kam dei na ka bynta kito ki paidbah kiba shong ba sah ha khappud ka Meghalaya bad Assam hynrei ka dei tang ban pynbeit ïa kito ki jaka ki heh spah ban lait ka jinghuri hura khnang ba kin ïoh ka Clearance bad kiwei ki jingioh,” la ong u Bah Pala.
U la kynnoh ba lada ka dei ka jingïapynbeit pud ba shisha, ki dei ban kynthup ïa ki Daloi, ki khlieh nongsynshar shnong bad kiwei ‘hynrei kam don kum kata, ki ïaleh para ma ki’.
