SHILLONG:
Ka jingïaid lynti jong u Bah Ardent Basaiawmoit, President ka Voice of the People Party (VPP) ban ïakhun pyrshah ïa ka sorkar kaba pyneh ryndang halor ka bhah thungkam thungjam da kaba shah thngan naduh ka 23 tarik Jymmang, ka la long kaba seisoh mynta ka 30 tarik Jymmang, hadien ba ka sorkar ka la pynjem khyndiat da kaba khot ïakren bad kane ka seng, kata ban ïakren lang halor kane ka mat ba ka seng ka ïeng, ka Reservation Policy.
Ha kaba ïadei bad kane, u MLA ka seng Congress na Gambergre Konstitwensi u Saleng Sangma haba kren halor ka jingthaw thymmai ïa ka Committee na ka bynta ban ïakren halor ka Roster System bad ka Reservation Policy, u la ong kaei kaba ka sorkar la leh ka long kaba biang namar kin lah ban ïakren bad ban poi sha ka jing ïasngewthuh bad u la ong ruh ba kaba bha ka dei ban don beit tang kawei ka bhah, kata 80 percent ïa baroh ki lai jaitbynriew bad kat kiba tbit kita kin ioh.
Haba kren bad ki nongthoh khubor ha MLA Hostel u Saleng u la ong ha ka jylla Meghalaya ki don lai tylli ki riewlum kiba bun paid, ki Khasi, Jaintia bad Garo, ha shuwa ban don ka jylla Meghalaya, ngi ïakhun da ka jngïatylli, kata ki Khasi, Jaintia bad Garo ban ïoh la ka jong ka jylla na ka jylla Assam.
“Baroh ki ïa tylli mlon tang ka wei hapoh ka APHLC. Lashai lashisngi lada ki Jaiñtia ki sdang ban dawa la kajong ka bhah thungkam, ka lah ban mih biang ka jingeh hapdeng ki Khasi bad ki Jaiñtia. Hangne ka ei kaba ngi ïa khun naka bynta ka Meghalaya lai ha ka wei, mynta kan long ba hapoh ki Khasi kin sa ïa khun ar la ka wei, ha Garo hills ruh lada ki Atong ki ïakhun bad pynpaw ba ki kwah la kajong ka bhah, kumne shibun ki jingeh kin mih,” u la ong.
U la bynrap da kaba ong, “Kan bha ban don 80% ka ban dei ïa ka jylla Meghalaya baroh ka wei, ngim dei ban pynduna na kaei kaba ngi don, napdeng ki riewlum ai kiba leh bha kin ïoh.”
U la bynrap da kaba ong, “Ngim dei ban ong Khasi Jaintia Garo, bad ha ka jingim jong nga kum u politician nga la ïohi ba ki don beit tang uwei lane ar ngut ki myntri Garo. Ha ka por u Mukul Sangma ruh, ki don tang lai ngut ki myntri kiba dei na Rilum Garo ha ka kynhun myntri jong u”.
U Saleng u la ban jur da kaba ong, “Ngi dei ban long ka wei, ngam sngew ba nga dei u Khasi ne Garo nga sngew ba nga dei u Meghalayan, ngi baroh ngi long ka wei. Lada don kiba sngew da kumwei ka dei ban don kaei kaei ka ban pynbha khamtam lada don kino kino ki jingeh, ka bha shibun ba ka sorkar ka la ailad ban ïakren halor ka Reservation Policy.”
“Ngi dei ban ieid iwei ïa iwei pat, ha kine ki sngi, ngi sngewkmen ba u wei na ka jylla u pass ïa ka eksam UPSC, hynrei um dei u Khasi, ne Jaiñtia ne Garo, wat la ngi sngewsih hynrei ngi dei ban kmen ba u dei na ka jylla Meghalaya, ngi hap ban pdiang ïa ka jingshisha,” u la ong.
U la bynrap da kaba ong, “Nga kwah ki Khasi, ki Jaintia bad ki Garo ba ki pass ïa ki Eksamin UPSC, ngi dei ban ïakhun ïa kum kine, ka pule puthi ha ka jylla ka hiar bha, ngi dei ban ïa khun ha kane ka bynta,” u la ong.
U la bynrap ruh da kaba ong ngi hap ban ïa khun pyrshah halor ka ïoh kam ïoh jam ha ka jylla katno tylli ki skul shimet ki don, ki kompani la kine ki ai kam aijam ne em ïa ki samla jong ka jylla ngi hap ban peit ïa kane.
Shuh shuh u la ong ba ngi dei ban ïakhun ban ïoh rung 50% ha ka ïohkam ïohjam ha NEHU, ha NEIGRIHMS, katno ngut ki Khasi ki jaintia bad ki Garo la ailad ban shah hikai kum ki Doctor. Kaei ka Percentage ha AIMS, ha IIM Shillong, kine ngi dei ba ngi hap ban ïakhun ban ioh rung khamtam haba ïa dei bad ka ïoh kam ioh jam.
