SHILLONG:
U Conrad K Sangma, Myntri Rangbah ka Meghalaya, uba leit ban shim bynta ha ka jingïalang jong baroh ki seng saiñ pyrthei halor ka jinglong jingman ka Manipur ha New Delhi ha ka Sngi Saitjaiñ u la kyntu ia ka sorkar pdeng ban thaw ïa baroh ki lad ki lynti ban pynïoh biang ïa ka shongsuk shongsaiñ ha kane ka jylla kaba la shah ktah ha ka jingïaumsnam bad ban jur ïa ka jingdonkam ba pynjai jai.
U Myntri Rangbah uba ïathuh ba ka seng jong u ka NPP ka la pynpaw ïa ka jingsngewkhia halor ka jingïakynad ha Manipur, ha kaba ki la don kumba 120 ngut ki briew ba la duh ïa la ka jingim bad palat 3,000ngut kiwei pat kiba la mynsaw naduh ba sdang ka jingïaumsnam ha ka 3 tarik u Jymmang.
U la ïathuh ruh ba ka NPP ka la kyntu ïa ka sorkar pdeng ban pynbiang ki marbam bad ki mar ba kongsan sha baroh ki dong ba la shah ktah bad ban buh ïa ki ktem ïarap.
U la kdew ruh ïa ka jingdonkam ban leh da kaba tyngeh ïa ki kynhun kiengatiar kiba donkti ha ki kam ïaumsnam.
“Dei ban leh da kaba tyngeh ïa kino kino ki kynhun kiengatiar kiba donkti ha ka jingïaumsnam khnang ban tehlakam ïa ki”, ong u Myntri Rangbah ka Meghalaya.
Shuh shuh u la ong, “Ka NPP ka ban jur ïa ka jingdonkam ban pynjai jai, ha kaba ka sorkar jylla, sorkar pdeng, ki seng sain pyrthei, ki seng niam kin leit ha manla ki imlang sahlang ban kyntu ïa ka shongsuk shongsaiñ bad ïatylli ha Manipur”.
U Myntri Rangbahduh Narendra Modi u la peitngor ïa ka jinglong jingman ha Manipur naduh ka sngi kaba nyngkong bad u la maitphang ïa ngi ban wad ïa ki lad ki lynti ban weng ïa ki jingeh, ong u Amit Shah, Myntri Pohïing ka sorkar pdeng ha ka jingïalang jong baroh ki seng saiñ pyrthei.
Ki tyllong khubor ki iathuh ba u Shah u la ïathuh ha ka jingïalang ba ka jinglong jingman ha Manipur ka la sdang ban jai jai biang bad ym don uwei ruh u briew ban ïap naduh ka 13 tarik u Jylliew ha ka jylla.
U la ong ruh ka jingïatreilang jong baroh ki seng saiñ pyrthei kan ïarap ban tem ïa ka jingïakynad bad ban pynïoh biang ia ka shongsuk shongsain bad ka jingshaniah hapdeng ki jaidbynriew bapher bapher ha Manipur.
Kat haduh mynta, ki la don haduh 1,800 tylli ki suloi ba la aiti noh.
Ki don 18 tylli ki seng saiñ pyrthei ba kynthup ïa ka BJP bad 4 ngut ki MP na ka Thaiñ Shatei Lam Mihngi bad 2 ngut ki Myntri Rangbah na ka thaiñ kiba la shim bynta ha ka jingïalang.
