SHILLONG:
Ka jylla Meghalaya katba dang mih ki snem ka dang kyrduh bording, ha ki snem ba la dep dei tang ha ka por mynmiet ba ki pynlip hynrei mynta ha ka por mynsngi ruh ki la pynlip bad kane ka neh da ki phew kynta.
U wei na ki samla Rangbah la jylla uba dei ruh u President barim ka TULBA u Bah Seiborlang Lyngdoh Nonglait u la ong ba ka sorkar MDA.2 kam don ka jingïohi jngai haba ïadei bad ka jingbym biang ka bording ha ka jylla bad u la kyntu ruh ïa ka sorkar jylla ba kan phai sha kiwei pat ki lad ban pynmih bording.
U la ong ba kane ka jing pynlip bording ka ktah ïa ka ïoh ka kot, ka khaïi ka pateng, ka pule ka puthi jong ki samla, ktah ruh ïa kiba bylla sngi namar baroh ki tiar mynta ki pyndon kam da ka bording.
“Kan sa poi ka por ba ka jing pynlip bording kan dei baroh shi sngi shi miet namar ka jing bym wan u slap,” u la ong.
U la bynrap da kaba ong, “Ka jingkylla ka suiñ bneng kan ktah ïa jinghap u slap. Ka Sorkar MDA.2 ka dei ban pyrkhat thymmai kumno ba pynmih bording, da kaba phai sha ka jingdon ki marpoh khyndew kum u dewïong (thermal power plant) ne ka jaka pynshit /pynkhluit kum ïa u dewïong bad ban thang pyning ïa u ban saiñ bording.
U la ong ruh ba ka Umiam kaba don saw stage bad ka Umtru kan nym lah pyndap ïa jingdonkam u paidbah. Ka jylla ka don bun bah u dewïong, ha jaka ban die sha Asssam ne sha Bangladesh ngi dei ban pyndonkam ban pynmih bording.
Shuh shuh une u samla Rangbah u la bynrap da kaba ong ka jingpyndon kam ïa ka bording ka nang bun katba dang mih ki snem. Ka Sorkar ka dei ban pyrkhat bad phai de sha ka jing pyndonkam ïa ka bor jong sngi (Solar Energy), ka bor jong ka lyer (Wind Mill) bad kiwei de.
