MAWKYRWAT:
Ki khynnah pule jong ka Sngap Syiem College ha ryngkat bad ki NSS Volunteers jong ka Sngap Syiem College South West Khasi Hills District mynta ka sngi kila ïa mih ha surok ban pyrta ban ong “Em ïa u Duma” ha ryngkat ki jingthoh ha ki placard kum shi bynta ban pyn saphriang ïa ka khubor sha ki wei pat ban pyrshah ban dih duma ne ban bam raja.
Ïa kane ka jingïaïaid paidbah jong ki khynnah skul la sdang na phyllaw jong ka Sngap Syiem College bad ïaid haduh ha ïew Mawkyrwat bad pynkut biang ha Sngap Syiem College.
Ki khynnah pule ha kane ka sngi kila rah ruh ïa ki jingthoh ha ki placard ïa ki kyntien kiba kit jingmut da kaba pyrta bad ong “Dih Duma la sngew kum ki Aktor hynrei kim tip pat ba la mong ki Tor”, “Bam Raja la sngew bhariew kum ka Aktress hynrei ym tip pat la hap ki bniat”.
Na ka liang ki khynnah skul jong ka Sngap Syiem College ki la buh ka jingkyrpad ïa ki para khynnah skul kiba dang lung ka rta bad kumjuh ïa baroh ki paidbah ba ki dei ban kiar ban dih ïa u duma ne ban bam ïa u raja, khaini bad ki wei de ki jingbam ba sniew namar lada ngi dih bad bam ïa ki ka wanrah ïa ka jingpang cancer, bad shibun ki wei de ki jingpang kaba ktah ym tang ïa u ne ka nongpyndonkam ka ktah ruh ïa kiwei de bad kumjuh ruh ïa ka Mariang. Namarkata ngi dei ban kiar ban ong em ïa u duma khnang ba ngin ïoh ïa ka met kaba koit bad ba khiah bha.
Ka Kong Banrilin Lyngdoh, Assistant Professor jong ka Commerce Department ha kajuh ka por kum ka Programe Officer jong ka National Services Scheme jong ka Sngap Syiem College, Mawkyrwat South West Khasi Hills District ka la ong ba kane ka jingpynlong ïa kane ka jingïaïaid paidbah jong ki khynnah pule naka bynta ki Higher Secondary bad na ki khynnah NSS jong ka Sngap Syiem College ka long kum shi bynta ban pynsaphriang ïa ka khubor sha ki wei pat ki briew ba kumno kin tip bad sngewthuh ban kiar ban dih ne ban bam ïa u duma sla kaba pynsniew bad pynjot ïa ki jingim jong ngi ki briew ha kaba bun na ngi ki briew ngi ïoh ki jingpang ha kiba bun rukom tang na ka daw ba ki briew ki dih bad bam ïa une u duma sla. Namar kata ka buh ka jingkyrpad ban kyntu ïa baroh ki khynnah skul bad ïa ki paidbah khlem da jer ïano ïano ba ngin ïa snoh kti lang ban wanrah ïa ka koit ka khiah da kaba kiar ban ong ‘Em ïa u duma sla’.
Ha kane ka sngi nalor ki khynnah pule la ïa donlang ruh bad ki katto katne ki Nonghikai jong ka Sngap Syiem College, Mawkyrwat South West Khasi Hills District kiba la wan ban ïa synrang lang ha kane ka jingïaïaid paidbah jong ki khynnah skul jong ka Sngap Syiem College, Mawkyrwat.
