SHILLONG:
Ki Regional Committee na ka Jaiñtia Hills bad Karbi Anglong, kum shibynta ban sdang noh ïa ka jingpynbkhreh ban pynbit pynbiang ïa ki jingdonkam na ka bynta ban pynbeit ïa u pud u sam jong ki ar jylla mynta ka sngi ka la pynlong ïa ka jingïakynduh ha Nongbah Shillong.
Hadien kane ka jingïalang, haba kren sha ki ladpathai khubor u Chairman ka Regional Committee na ka West Jaiñtia hills, u ba long ruh u Symbud Myntri rangbah ka jylla , u bah Sniawbhalang Dhar , u la ïathuh ba kane ka jingïakynduh ka long ka ba nyngkong bad kan sa dang don biang ki jingïakynduh ha ki bnai ban wan bad shwa u bnai Nailar ki Regional Committee na ki ar jylla kin aiti noh ïa ka kaiphot jingpynbeit jong ki .
“Mynta ka sngi ka dei ka jingïalang ka ba nyngkong jong ki Regional Committee na ka jylla Assam bad Meghalaya, bad ngi la ïoh ka lad ban pynïathuh ïa baroh ki dkhot ha ka ne ka jingïalang bad ngin sa sdang noh ïa ka jingbishar bnaih halor ka jingpynbeit ïa u pud u sam ha ka wat ba ar ha kine ki sngi ban wan”u la ong.
U la bynrap “Ka jingpyrshang jong ngi kan long ban lah ban pynbeit noh ïa kane ka mat bad ngim pat rai da kino ki lad ban pynbeit ïa u puda u sam namar ba kan dang donkam ba ngin leit jurip shwa ïa kine ki jaka bad da ka jingïamynjur lang jong baroh ngin pynbeit ïa kane ka mat”.
U Bah Dhar u la ong, “Kum ki Regional Committee ki ba dei ban peit ïa ka jingpynbeit ïa u pud u sam sha kine ki thaiñ, kin sa hiar ban jurip ha ki bnai ban wan sha kine ki jaka namar ba ngi don ïa ka jingthmu ban aiti noh ïa ka kaiphot jong ngi ha shwa u bnai Nailar kumta ngin sa leit ban hair jurip ïa kine ki jaka”.
Haba kylli u la ong halor ka jingdawa ki nongshongs hnong ba ki kwah ban hap sha Meghalaya ngim pat la ïa kren eiei mynta ka sngi ha kane ka jingïalang namar mynta ka sngi ka dang dei tang ka jingsdang bad ngin sa peit, ka Block I ka Khanduli kaïa pher bad ngin bishar ban pynbeit jaijai da ka jingïamynjur lang”.
Ha kane ka jingïalang la wan shgim bynta da u Synbud Myntri rangbah ka jylla u abh Sniawbhalang Dhar u ba long ruh u Chairman ka Regional Committee West Jaiñtia Hills, ha ryngkat ki MDC ka JHADC bad u Chairman ka Regional Committee ka Karbi Anglong, u Piyush Hazarika bad ki MDC ka KAAC.
Lah ban kdew hangne ba na ka liang jong ki Myntri rangbah jong ki ar jylla ka Jylla Assam bad Meghalaya ha ka 24 Tarik u Jymmang ki la pynlong ïa ka jingïakynduh ban sadng noh ïa ka wad baar jong ka jingïapynbeit u pud u sam hapdeng ki ar jylla, haka ba ki la rai ban aiti noh ha ki Regional Commitee jong ki ar jylla ba kin sdang noh ka jingpynkhreh ban bishar ïa kine ki jaka.
