SHILLONG:
Saw sngi hadien ba sangeh shah thngan u President ka Voice of the People Party (VPP), u Bah Ardent Miller Basaiawmoit ban dawa na ka sorkar jylla ba pynbeit thymmai ïa ka Reservation Policy, u Bah Paul Lyngdoh, u nongïalam ka United Democratic Party (UDP) bad u Myntri ka sorkar Meghalaya Democratic Alliance (MDA) u la buh ka jingkylli ïa u Bah Ardent, ba balei um treh ban pynkhih ïa ka Reservation Policy, ha ka por ba u Dr Mukul Sangma u dang long kum u Myntri Rangbah ka jylla.
Ha ka 5 tarik Jylliew, u Bah Paul Lyngdoh, u MLA ka West Shillong Constituency, u la mih shakhmat ban pynshai halor ka jingshah kynthoh jong u, na ki ba bun balang ba u jah na ka jylla katba dang don ka jingïakhih ban dawa pynbeit ïa ka Reservation Policy.
Ha ba kren sha ki lad pathai khubor u Bah Paul u la ong, “Halor ka mat Reservation Policy, nga la dep ban kren 20 snem mynshwa, bad kane ka paw ha ki video ki ba la saphriang mynta hynrei nga kwah ban kylli kylla, hangno ka don ka jingkren u Bah Ardent Miller Basaiawmoit ha kato ka por halor kane ka mat namar ba u ruh u dang long kum u nongïalam ka Sengbhalang? Kam shem la don kano kano ka jingkren na ka liang jong u namar ba u khlem wan ban ïasoh lang ha ka jingshah thngan jong ngi”.
“Watla katta ruh ngi khlem beiñ ïa u ha kato ka por, namar ba kan shitom bha ïa u, ban kren halor ka Reservation Policy, namar u dei u President ka Ferderation of Khasi Jaiñtia and Garo People (FKJGP), kumta ngim kwah ban buh ïa u ha kane ka jingeh, hynrei ha ka jingïakhih shah thngan u Bah Ardent, watla u khlem khot lang ïa ngi hynrei u General Sesretary ka UDP u Bah Jemino Mawthoh, u la leit ban ïakynduh ïa u,” la ong u Bah Paul.
U Bah Paul u la ong shuh shuh, “Kane ka jingkylli ba balei ngam leit ha ka jaka ba u Bah Ardent u shah thngan? Ka jubab ka ba shai ka long ba kumba u paidbah u la jied ïa nga ban long kum u nongïalam bad nongmihkhmat ngan pyndep ïa kata ka kamram hapoh ka kynhun myntri”.
“Ha ka sngi ba ngan mih na Shillong ban leit sha Swizerland, 8 sngi shwa kane ka sngi ka la don ka jingïakynduh ban ïa kren halor kane ka mat bad kaei ka ba nga la kren haphoh ka jingïalang ki kynhun myntri, ngam lah ban ïathuh mynta namar ngam lah ban pynkheiñ ïa ka kular ba nga la smai ha ba shim ïa nga kum u Myntri Sorkar. Hynrei haba la jied ïa nga ba ngan pyndep ïa la ka kamram sha ki kynhun myntri”, u la bynrap.
U la buh ruh ka jingkylli sha u Bah Ardent, “Ngam sngewthuh ba balei donkam ban lum, ban lang ban pynkhih win ïa u paidbah ha kane ka rukom, tang 3 bnai ba la thaw ïa ka sorkar ba thymmai hynrei u Dr Mukul Sangma u ba la ïoh ban pynïaid ïa ka sorkar 8 snem ki sngap jarjar halor kane ka mat”.
“Ki paidbah ki dang shu dep ban jied ïa ki nongmihkhmat, wat tang ka sia ba tah ha tyrsim ruh ym pat khuid, mynta ïa ki juh ki paidbah ban wan sha Secretariat ban ïa shong madan haba ka long kumta kan don jingmut aïu ban jied nongmihkhmat namar ha ba la jied ïa ki nongmihkhmat kan dei ka kamram jong u, ban long nongïasaid na ka bynta u paidbah khnang ba phi phin ïoh ban bteng ïa ka kamai jakpoh”, u la bynrap.
“Ngam sngewthuh ruh ba don na ki katto katne ngut ki nongñiah taksi, ki ba la wan shane sha ïing ban kren halor ka Reservation Policy, ngam tip kin ïoh jingmyntoi aïu lada pynkiew ïa ka bhah thungkam sha ka 70% ruh? Namar ki kin ym ïoh jingmyntoi shuh namar kin ym ïoh kam sorkar shuh. Haba ki ong nongmihkhmat, ai ba un long uba mih khmat na ka bynta jong phi, dei ban ai lad ïa ki ban kren”, u la ong.
U Bah Paul u la ong ruh ba u ai khublei ïa u nongïalam ka KSU uba la ai jingmut ban thaw da ka Expert Committee, namar ngi donkam ïa ki stad (expert) ki ba la tbit ha baroh ki liang ban pynbeit ïa kane ka mat. Ha ba ong ki Expert kin dei ki briew ki ba tip ïa ka riti shynshar, ïa ka aiñ, ïa ki rule, bad kiwei kiwei hynrei ha ka jaka ki stad (expert) kin wan batai noh da ki nongñiah auto, ki nongdie madan halor ka Reservation Policy te kam long ka ba dei”.
