SHILLONG:
U bah Disparsing Rani, u nongwad RTI ha ka jylla, u la buh ka jingkylli ïa ki nongpynïaid ka Civil Hospital, Shillong halor ka jingbym shim khia ban pynbiang ïa ki tiar sumar ki ba la duh ha kane ka hospital, wat la kane ka hospital Sorkar ka lah ban pynmih pisa haduh T.6 klur tam ha ki lai snem ïa kane u la kren ha ka jingïakynduh bad ki lad pathai khubor ha ka 6 tarik Naiwieng ha Shillong Pressclub. U bah Disparsing Rani, u la ïathuh ba u la wad da ka RTI halor ka jingpynmih pisa ka Civil Hospital na ka jingsiew ki nongpang ïa ki test bapher bapher ki ba la leh ha kane ka Hospital Sorkar, kine ki test ki kynthup ïa ka test Snam, CT scan, Scaning, MRI bad X-ray.
U la ïathuh ba katkum ka RTI ka ba la ïoh la lap ba ka Civil hospital ka lah ban pynmih ïa ka pisa haduh T. 6 klur tam ha ki lai snem, ki ba kynthup ïa ka jingtest snam ka ïoh ban lum T 2 klur tam, na ka Xray, T. 4 lak tam, scanning T. 57 lak tam, CT Scan T. 2 klur tam bad MRI T. 26 lak tam. U bah Disparsing u la kdew ruh ba wat la ka Civil ka lah ban pynmih ïa ka pisa ka ba bun hynrei ka ba lyngngoh ka long ba shaei ki pyndonkam ïa kane ka pisa namar ba ka wei na ka MRI Machine ka ba la buh ha ka 25 tarik Nailar 2013 ha Civil hospital ka la duh noh 5 tarik Nailar 2022, hynrei haduh mynta ki khlem shimkhia ban pynbha ne ban buh thymmai ïa kane ka MRI ha kane ka hospital.
U bah Disparsing u la wad ruh ïa ka RTI halor ka jingïoh pisa ka sorkar na Delhi ha ka ba ïadei bad ka jingtehlakam ïa ka Khlam Covid ha ka jylla, bad kane ka long hadien ba don na ki nongtrei ka tnad koit ka khiah ki la ud ba kim pat ïoh ïa ka jingsiew ïa ka jingtrei ka ba ki la dep haduh mynta. U bah Disparsing u la ïathuh ba kumba ha ki snem ba la dep ka sorkar ka la pyntip ba ka ïoh T. 76 klur na Delhi hynrei haba u la wad da ka RTI bad lap ba ka sorkar ka ïoh haduh T. 119 klur na Delhi bad kumba ka long mynta ka sorkar ka dang don sa T. 43 klur ka pisa ka ba ïoh na Delhi. U bah Disparsing u la kyntu ïa ka Sorkar ba ka dei ba siew ïa ki nongtrei Covid ki ba kynthup ïa ki 26 ngut ki Doctor, 100 ngut ki staff nurse, 85 ngut ki Paramedical bad kiwei kiwei.
U bah Disparsing u la pan ruh ïa ka RTI na ka tnad Social Welfare halor ka jingpynlut ban sumar ïa ki briew ba la kyrni ha u drug ha Nongbah Shillong, ha kaba lyngba ka RTI u la ïoh jingtip ba naduh u snem 2010 haduh u snem 2023, ki nongphah sumar na ka jingdih drug ha Shillong ki don 3180 ngut ki shynrang bad 32 ngut ki kynthei bad na ka liang ka tnad kam shem la pynlong ïa kano kano ka prokram pynhusiar(awareness program), ban tehlakam ïa ka jingdih drug ha kine ki snem bad ka jingpynlut ban sumar ïa ki 3,212 ngut ki nongdihdrug ha Shillong ka poi haduh T92, 890,556 (T. 9klur tam) ha ki 13 snem. Na ka liang u bah Disparsing Rani u la pyntip ba shen un sa wad bniah ba ka tnad ka pynlut haei bad kumno ïa kane ka pisa ka ba kot sha ka 9 klur tam tang na ka bynta ki nongphah sumar ki ba don tang 3000 ngut tam ha Shillong.
