SHILLONG:
Ka Hynniewtrep Integrated Territorial Organization (HITO) ka la pynpaw ka jingsngew bitar bad ka la tar ïa ka shithi ha kaba ïadei bad ka jingkhot ka sorkar jylla ban kren halor ka Reserva-tion Roster bad ha kajuh ka por ki la kyntait ban leit sha kane ka jingïalang.
Lah ban kdew ba ka sorkar ka la khot ïa ki sengbhalang bapher bapher ban ïakren halor ka Reserva-tion Roster ha ka 31 tarik mynta u bnai ha ka por 11 shiteng ha Auditorium Hall, Yojana Bhavan, Meghalaya Secretariat.
Haba kren mynta ka sngi sha ki lad pathai khubor, u President ka HITO u Bah Donbok Dkhar, u la ong, “Ngi kwah ban phah ïa kane ka kyrwoh sha ka sorkar jylla, kumba la tip hi ba ka HITO ka ïeng skhem ha la ka nongrim ba dei ban pynbeit thymmai noh ïa ka Reservation Policy hynrei kaba sngewphylla pat ba kane ka sorkar dang mynnin ka sngi, ka la phah ïa ka shithi sha ka ophis jong ngi bad na ka liang ka jong ngi, ngi kyntait ïa kane ka jingkhot”.
U Bah Donbok u la ong ba naduh kaba sdang hi ka seng ka ïeng skhem beit ha la ka nongrim ban dawa ïa ka sorkar jylla ba kadei ban pynbeit thymmai noh ïa ka Reservation Policy. “Wat nym pynbeit ïangi ki khun samla ka jylla Hynniewtrep namar ba ki paidbah ka Ri Khasi, kiba bun ba nang ki mynjur ban peit bad pynthymmai noh ïa ka Reservation Policy. Hynrei kane ka sorkar ka kwah ban leh da ka buit pynslem, ka thung ruh ïa kiban khlieh ïa kane ka Committee ruh da ka Kong Amapreen Lyngdoh kum ka Chairman, kaba la kren teng ruh naduh mynshwa ïa kata ka State Reservation Policy ha u 2018 bad mynshem snem ruh kumjuh, hashwa ban wan kane ka elekshon kaba la dep. Kumjuh ruh u Bah Himalaya Shangplianh, u kren ïa kane kajuh hi badei ban peit bad pynbeit thymmai noh ïa kane ka Reservation Policy hynrei mynta haba kito hi kiba shong hangto, hato ngin dang shaniah kum kine ki briew. Hato ngin shaniah ïa kane ka sorkar, balei ngin kren biang ïa kajuh, kumba la dep ha u snem 2013 ngi dawa ïa ka Inner Line Permit (ILP), ki wanrah pat da ka .
U la ong ba lada ka sorkar ka kwah shisha ban pynbeit ïa kane, kadei ban khot ïa ka seng Voice of The People’s Party (VPP) ban ïakren ïa kane ka Reservation Policy bad kata kadei ka lynti. “Phin khot ïangi ki sengbhalang, ngim dei mangi ban shna ïa ka aiñ, ngim dei ki nongïasaid aiñ hynrei kidei kitei ki nongmihkhmat kiba ngi la dep thep vote bad pynjop, dei kita kiba dei hok. Phin khot leh aïu ïangi, phin shu pynsngeW, namar ngi tip shai, kaei ka jingbuit tuh jong ka sorkar MDA (2.0). Dang shen ka sorkar MDA ka la khot ïangi ruh halor ka Memorandum of understanding (MOU) halor u pud u sam, phi khlem khot ïangi ban ïakren hynrei phi shu ong, pule ba ngi la dep katta mynjur ne em. Ha kane ruh ngi sngewthuh ba kane ka kaiphod ba ka sorkar kan ai hapoh 15 sngi ban pyntreikam ïa ka Roster System, ngan ong tang kane kawei, phi lah ban pynbeij ïangi shisien hynrei phim lah ban pynbeij ïangi bunsien”.
Na ka liang ka HITO ka pyneh beit triang ba kan nym leit sha kane ka jingïalang kaba la khot da ka sorkar jylla bad ka la kyntu ruh ïa kiwei kiba la shah khot sngewbha ban nym leit namar kam bha bad kadei ka ïap ka im jong ka jaibynriew.
U Bah Donbok u la ïathuh ruh ba la don ki longkmie kiba la phun ïa u bad ong, “Balei yn shah thngan tang u Bah Ardent Basaiawmoit hynrei kadei ruh ka ïap ka im jong ki khun jong ki ban mih sha madan. Lada phi ïohi ia ki MLA jong phi sha lynti synkien, shondur bad ai syntiew ïa ki bad pynkynmaw ba ki la dei ban ïakren noh halor kane ka Reservation Policy bad lada kim kren lano kin kren”.
U la ong ba ki la don kiba ong ba kane ka jingleh kadei tang ka jingpynbeij hashwa ka elekshon MDC bad MP hynrei ïa kane ka Reservation Policy lane ka bhah thungkam thungjam, ka VPP bad ka HITO hi ka la dep ban kren naduh ka shwa ka elekshon. Hynrei bym pat thar u shiah kim pat sngewthuh bad mynta ba la thar u shiah hangta ki sdang sngewthuh bad ïa kane ki paidbah kim dei ban sngewthuh bakla ba ong ba dei tang na kadaw kaba la jan ka elekshon hynrei halor kane kadei ka ïap ka im jong ki khun samla ka ïap ka im na ka bynta ka jylla hi baroh kawei.
