SHILLONG :
Ka Tyrna Elaka Sidarship ha ka jingïatreilang bad ka Tourism Management Committee jong ka Dorbar Shnong kan sa rakhe ïa ka jingdap 125 snem ka shnong Tyrna ha ka 7 bad 8 jong u bnai Nohphrah, 2022. Ha kane ka sngi kin pynlong ruh ïa ka 2nd Living Root Festival 2022 ne ka tamasa jynkieng dieng jri.
Haba kren sha ki lad pathai khubor u Sirdar jong ka Tyrna Elaka u Bah Andrias Wansai u la ïathuh ba ka shnong Tyrna kan sa dap ïa ka 125 snem na ka jingkynriah shnong na ka shnong kaba rim sha ka shnong kaba thymmai bad ka shnong kan sa rakhe kyrpang ïa kane.
Ka shnong Tyrna ka dei kawei na ki shnong kaba riewspah bha ha u soh u pai khamtam ha ka jingpynmih ïa u Sohñiamtra. U Bah Andrias u la ong ba ka jingwan poi jong ki ban shong sha kane ka shnong thymmai kadei hadien ka u jumai bah jong ka snem 1897 bad ka la don ka jingkylla kaba shyrkhei naduh ki jingtwa, ka jingpra jong ki ïing ki sem bad kiwei de.
Ha kawei pat ka liang u Chairman jong kane ka Tamasa u Bah Donborwell Marbaniang u la ong ba na ka liang ka Committee kan pynlong ruh ïa ka tamasa kaba la tip kum ka 2nd Living Root Festival kaba long shibynta ban pynneh pynsah ïa ka mei mariang bad kyntiew ïa ka kam jngohkai hapoh katei ka thaiñ Tyrna.
U la ïathuh ba ka tamsa ba nyngkong la pyllong ha u snem 2018 bad hadien ki la thmu ban pyllong ha u snem 2022 hynrei na ka daw ka jingwan lyngshop ka khlam Covid-29 ki khlem ïoh shuh ban pyllong bad mynta u snem kin sa ïoh ban pynlong ïa kane ka tamsa ka ba-ar. U la ïathuh shuh shuh ba u kongsan ha kane ka sngi un dei u myntri rangbah ka jylla u Conrad Kongkal Sangma bad katto katne.
U Bah Donborwell Marbaniang u la ïathuh ba ha kane ka prokram kin don shibun ki jingpynkhreh naduh ki jingpyni nam ba bun jait, ki jingshad, ki jingrwai tynrai, kum shi bynta ban pyni nam ïaka jingriew spah ka thaiñ Tyrna lem bad kiwei.
Ha kane ka sngi rakhe kan sa don ruh ka jingïakop thei bhabriew ki nongïashim bynta kidei ban don 18 snem shaneng bad ki nongïashim bynta kidei tang na ka thaiñ Shella konstiwensi.U la ïathuh ba ha kane ka tamasa ba mynta kan don ruh ka jingïakop thei bhabriew naka bynta ki samla kynthei jong ka Shella konstiwensi kiba dang 18 snem haduh 25 snem. Ki nongjop ha kane ka jingïakop thei bhabriew lane ka Miss Living Root kadei T. 30,000 ïaki ba jop nyngkong, T. 15,000 ïa ki ba wan ba ar bad T. 10,000 ïa ki ba wan ba lai.
Katba na ka liang u jong u Secretary ka Tourism Management Committee u Bah Wosly Majaw u la ïathuh ba ka jingkieng jri kiba don ha kane ka thaiñ ki don kumba 3 tylli, kawei la plie na ka bynta ki nongwan jngohkai kaba ym duna shuh ïa ka 90 snem bad kine kiwei kiwei pat ki
