SHILLONG:
Ha ka jingïakynduh hapdeng ki nongmihkhmat na ka Karbi Anglong Autonomous Council (KAAC) bad ki nongmih khmat ka Khasi Hills Autonomous District Council (KHADC) ka ba la long mynta ka 14 tarik Nailur 2023, ki la mynjur lang ban don ka jingïatrei lang ka ba skhem hapdeng ki ar Council. Mynta ka sngi ki nongmihkhmat ka KAAC hapoh ka jingdonlang u Member of Parliament (MP) ka Karbi Anglong u Horen Singh Bey, u CEM ka KAAC u Dr. Tuliram Ronghang bad 12 ngut ki executive member (EC) ka KAAC ki la hiar sha KHADC ban ïa kynduh ïa ki nongmihkhmat ka KHADC.
Haba kren sha ki lad pathai khubor na ka liang u CEM ka KHADC, u bah Pyniaid Sing Syiem u la ïathuh ba ha kane ka jingïakynduh la ïoh ban ïakren ïa shibun ki mat ki ba ïadei bad ki ar Council ha ka ba ki la shim ïa ka rai ban don ka jingïatrei lang ha baroh ki liang. “Ngi la shim ïa ka rai ban ïatreilang ha ka ba ïadei bad ka jingpynneh pynsah ïaki riti dustur jong ki nongshong shnong ka jylla Meghalaya bad ka jylla Assam” u la ong. U la bynrap “Nalor kine ngi la ïoh ban ïakren ruh halor ka jingïatrei lang ban wanrah ka jingshong shngaiñ hapdeng ki nong shong shnong ka Meghalaya bad Assam khamtam haki thaiñ khappud”.
U bah Pynïaid u la ïathuh ruh ba ha kane ka jingïalang la ïoh ruh ban ïasyllok halor ka jingshong syier ki Khasi pnar ha ki thaiñ khappud kiba sah ha Block II bad kum u CEM ka KAAC u la kular ba un shim khia ban teh lakam ka suk ka saiñ katba ka jingïakren pynbeit pud hapdeng ka sorkar Meghalaya bad Assam. Haba kylli u bah Pynïaid u la ong “Ka jingïakren hapdeng ki arylli ki sorkar jylla lyngba ki Regional Committee jong ka Meghalaya-Assam ka dang ïaid bad ka KHADC ruh ka ïaid ryngkat ryngkat bad ki ha ka ba ïadei bad ka ne ka mat bad ka rai hi kan shim ka sorkar jylla haka jingïakren bad ka sorkar Assam bad ka rai ba ki artylli ki sorkar jylla kin shim kan dei beit katkum ka jingkwah ki paidbah”. Na ka liang u CEM ka KHADC u la ïathuh ruh ba na ka liang ka Executive Committee (EC) dang shen, ki la leit ruh ban jurip ïaki Khasi-Pnar ba sah ha Block II bad la shem ba ki don 23 tylli ki shnong Khasi-Pnar.
