MAIRANG:
Kum shibynta ban kyntiew bad ban pynpaw ïa ka sap jong ki nongseng kam lajong bad ki riewdonsap jong ka jylla ban ai ha ki ïa ka rynsan ïatei bad phylliew jingmut, na ka liang ka ophis jong u General Manager, District Commerce & Industries Centre, West Khasi Hills District, Nongstoiñ ha ka 13 tarik Ïaïong 2023 ka la pynlong ïa ka District Level Industrial Exhibition kaba nyngkong eh ha Mairang, Eastern West Khasi Hills District.
Ïa kane ka jingpyninam (Exibition) kaba ar sngi kaba la pynlong hapoh Tirot Sing Memorial Hall, Pyndengumiong la wan ban plie pyrda da ka Kong V.A. Hynniewta kaba long ka Additional Deputy Commissioner jong ka Eastern West Khasi Hills District, kaba la long kum ka Kongsan ha kane ka prokram ha ryngkat ka jingïadonlang jong u General Manager ka District Commerce & Industries Centre, West Khasi Hills District, Nongstoiñ, u Bah B.F. Sun, kiwei de ki ophisar na ki tnat treikam bapher bapher jong ka sorkar, u Sordar shnong Pyndengumiong u Bah B.Syiemiong lem bad ki nongsengkam lajong kiba dei na ki thaiñ East Khasi Hills, West Khasi Hills bad Eastern West Khasi Hills District.
Haba ai jingkren ha kane ka jingïalang kum ka Kongsan, ka Additional Deputy Commissioner ka Eastern West Khasi Hills District, Mairang, ka Kong V.A. Hynniewta, ka la ai khublei kyrpang ïa ka District Commerce & Industries Centre, West Khasi Hills District, Nongstoiñ na ka bynta ka jingpynlong jong ka ïa ka District Level Industrial Exhibition kaba nyngkong eh hapoh Eastern West Khasi Hills District kaba la pynïoh mynsiem ïa ki nongsengkam lajong bad ki riewdonsap ka thaiñ bad ka jylla hi baroh kawei lyngba ka rynsan ban pyni ïa la ki sap ki talen ki jong ki bad ka la kyntu ruh ïa ki paidbah ba kim dei ban khmih lynti than tang ïa ka kam sorkar hynrei ban wad lad wad lynti da kumwei pat ban ïeng ha la ki jong ki kjat da kaba ba seng ïa ki kam lajong.
Shuh shuh ka jingthmu jong kane ka Exhibition kaba ar sngi ka long ban ailad ïa ki nongseng kam lajong ban pyni ïa la ka sap ka phong lyngba ka kam kaba ki trei bad ban ai mynsiem ruh ïa kiwei pat ki nongshongshnong ba kin kyntiew ïa la ka ïoh ka kot lyngba ka kam lajong da kaba shim kabu ïa ki lad jingkyrshan jong ka sorkar lyngba ka tnat Commerce & Industries.
Ha kane ka Exhibition kaba arsngi, la ïoh ban sakhi ruh ïa ka jingdon jong ki dukan bapher bapher kiba kynthup ïa ki dukan die jingbam, ki dukan kiba die ïa ki jingshna bad jingbuh jingsat ba la ohshrong na ki dieng bad siej, ki dukan die jaiñ bad kiwei kiwei de ïa kiba la buh da ki nongseng kam lajong bad na ki tnat sorkar ruh kumjuh.
