GUJARAT:
U nongai ktien ka seng All India Trinamool Congress (AITC), u Saket Gokhale u la shah kem biang ha ki pulit Gujarat ha ka janmiet jong ka 29 tarik Nohprah halor ka jingshah kynnoh ba u la pyndonkam bakla ïa ka pisa ba la lum na ki synñiang paidbah.
Ha ka jingpyntip da u pulit rangbah, u la pyntip ba la kem ïa u Gokhale na ka nongbah Delhi da ka Ahmedabad Cyber Crime Branch. Shuh shuh kane ka dei ka sien kaba lai ha kaba u Gokhale u la shah kem ha ki pulit Gujarat.
La kem nyngkong ïa u da ka Cyber Crime Branch ha ka 6 tarik Nohprah halor ka jingpyn saphriang khubor bakla shaphang u Myntri Rangbahduh ka ri, u Narendra Modi shaphang ki jinglut jingsep jong ka jingleit sha ka nongbah Morbi hadien ka jingkhyllem ka jingkieng ba kot haduh 30 klur tyngka.
Hadien kane u Gokhale u la lait jamin na ka ka Ïing Bishar ha kaba la shah kem biang ha ka 8 tarik Nohprah da ki pulit Morbi halor kajuh ka bynta, hynrei u la lait jamin noh tang ha ka sngi kaba bud.