SHILLONG:
Ki nongïalam ka Hynniewtrep Youth Council (HYC) ha ka 18 tarik Nohprah 2023 ki la pynlong da ka jingïalang ban kynmaw burom ïaka lyngkhuh sngi ïap ba 83 snem jong u Myllung Soso Tham ha phyllaw ka Soso Tham Auditorium Shillong.
Na ka liang ka HYC ha ka jingïalam u president rangbah, u Bah Roykupar Synrem, u nongïalam barim ka u Bah Robertjune Kharjahrin lem bad ki dkhot na kylleng ki unit kila pynlong ka jing ïabuh syntiew ha khmat u Mot-Dur u Soso Tham.
Haba kren ha kane ka sngi u president ka HYC u Bah Roykupar Synrem u la pynkynmaw ïa ki kam ba ratbah ki ba u Myllung Soso Tham u la leh na ka bynta ka jaitbynriew.
“Ki kam ki ba u Myllung SoSo Tham u la leh ka pynlong ïa ki longdien ba dei ban pyndonburom ïa ka lyngkhuh sngi ïap jong u Myllung ka Jaitbynriew. U Myllung Soso Tham u dei u nonghikai, u ba la ai ka jinghikai ym tang ha ki skul hynrei u ai ka jinghikai ïa ka Ri bad ka jaitbynriew halor ka akor ka burom bad kumno ban poi sha kliar lum jong ka man” u la ong.
U la bynrap, ”hynrei haba phai sha ki jingeh jong ki nonghikai ha ka jylla mynta, ka jingkylli ka long ba kaei ba ka sorkar ka ai sha ki nonghikai jong ngi?”.
“Dang shen ki nonghikai bala shongthait kila pynpaw ba wat la ki la ai ka jingshakri la 30 snem ruh hynrei kim pat ïoh satia ïa ka bai bam tymmen, hynrei ki MLA ki ba tang 2 snem ki la ïoh ïa ki Baibam tymmen, ”u la ong.
U la kyntu ïa ka sorkar ba ka dei ban ai ïa ka burom sha ki nonghikai kum ba ki dei ban ïoh ym ban shu pyndon burom ïa ki tang ha ka sngi kyrpang jong ki.
U la ai jingmut ruh sha ka Sorkar ba ka dei ban pynthikna ba baroh ki nonghikai ha ki skul kin shah kynthup haka juh ka thup rukom siew tulop.
“ka Sorkar ka dei ban kyntiew ïaki nonghikai ka Jylla da ka ba wanrah da ki Policy ki ban ïarap ban ban ai burom ïaki nonghikai ka Jylla” u la ong.
Haba ïadei bad ka jingthmu ka Sorkar ban wanrah noh daki kot NCERT ha ka jylla, u Bah Roykupar u la kyntu ïa ka sorkar ba ka dei ban bishar bha shwa ban pynurlong ïa kane.
U Bah Roykupar u la ong baka Sorkar Jylla kadei ban pynthikna ba kot NCERT ki ban pyndonkam haki skul kidei ban pynneh ïaka thymmei jong ki trai ri ka Jylla Meghalaya khamtam haba ïadei bad ka jingsynñiang ki riew khraw thohkot ki ba dei ki trai Ri ha ka Jylla.
Ha kane ka sngi la sam ruh ïa ki khusnam sha ki nong jop jingai jingkren lyngkot kaba la pynlong da kane ka seng halor ka mat ‘Jingma Ka Jaidbynriew namar ka Jingai Jaitkpa’ bad ka jingthoh Essay halor ka phang pdeng ‘Khulom Ksiar’ ïaka bala pynlong daka Socio Cultural Cell.
