SHILLONG:
Ka Khun Hynñiewtrep National Awakening Movement (KHNAM) kala pynpaw ïa ka jingbym ïahap ïa ka jingong ka Sorkar lyngba u Myntri Rangbah u Conrad K Sangma ba ka Roster System ka dei ka kam kaba bteng.
Na ka liang U Vice President ka KHNAM u Bah Thomas Passah haba ïakren bad ki Nongthoh khubor u la ong ba lada ka Roster System kadei ka kam kaba bteng kam dei satia ban phai shadien, hynrei ka dei beit ban bteng nangne shakhmat.
Ka KHNAM ka la buh jingkylli ruh ïa ka Sorkar ha kano ka rukom la pyndonkam ïa ka jingkheiñ haba ïadei bad ka Roster, bad lada ka pyndonkam ïa ka point, ka la shim da ka point kaba katno?
U Vice President ka KHNAM, u Bah Thomas Pasah u la ong ba ïa kane hap ïoh ka jubab kaba shai na ka Sorkar namar ban shu ong ba ka Roster ka dei ka kam kaba bteng, ym lah satia ban pdiang ba kan phai biang shadien.
“Kata ka jingbatai lane presentation kaba ka Sorkar ka la ai ha ka jingïalang jong ka Kynhun Myntri kam lah satia ban long ban shu sngap ïa ka jingbatai, hynrei hap ban pyni ïa ka jingbatai kaba shong nongrim,” u la ong.
Na ka liang une u Nongïalam la ong, “Ka KHNAM, ka la pynkhreh la kajong ka jingbatai lane presentation kaba la pynshong nongrim katkum ki kot ki sla ban pyni ha ka jingïalang jong ki seng saiñpyrthei ka ban long mynta ka sngi ka 19 tarik u Jymmang 2023.”
U Bah Thomas u la bynrap da kaba ong, “Ka Sorkar ka dei ban sngap lang ïa ka jingbatai kaba wanrah kiwei, ym ban khot tang ban shu sngap bad peit ïa kata ka presentation jong ka.”
“Haba ïakren ïa ka Roster, donkam hi ban ïakren lang ïa ka Reservation Policy,” ong u Vice President ka KHNAM.
U Bah Thomas ula ong ruh ba ka jingïalang jong baroh ki seng saiñpyrthei ka dei ban long kaba kylluid ban ïakren namar lada ym ïakren ha kata ka jingïalang, ka lah ban mih jingeh lada hap ïakren ha surok.
Ha kawei pat ka liang, ka KHNAM ka la ïai ban ïa kaei kaba la dep kren naduh mynshwa ba katba dang ïakren ïa ka Roster, dei ban buhteng shwa ïa ka jingkhot thep kam ha ki tnat treikam bapher bapher ka Sorkar Jylla.
U la bynrap ruh da kaba ong, “Haba ka Sorkar ka buhteng ban khot thungkam ha ki tnat bapher bapher, ka dei ruh ban leh ei ei na ka bynta ki khun samla kiba la kut ka rta bad kiba la jan kut ka rta wad kam namar kim ïohlad ban thep kam ha kine ki bnai ba la bthah ka Ïingbishar ban pynsangeh ïa ka jingthungkam katba dang pynkhreh ban pyntreikam ïa ka Roster System.”
Shuh shuh une u Nongïalam u la bynrap da kaba ong ba lada ong ban sangeh lut ka jingkhot thep kam tad haduh ban da pynbeit thymmai ïa ka reservation policy, lehse kan shimpor shuh shuh namar ban pynbeit ïa ka Reservation Policy ka dei kaba kham slem bad kham shimpor.
