SHILLONG:
Ka jingmih jong u paidbah ha kylleng ka Ri Khasi Jaiñtia ban buh jingkylli na ki nongmihkhmat jong ki ba balei ki sngap jar ha ka ba ïadei bad ka ka la dang rhem kat ba dang bteng ka jingïakhih shah thngan u President ka VPP, u Bah Ardent Miller Basaiawmoit ha Nongbah Shillong.
Mynta ka sngi u President ka VPP u la bteng ïa ka jingshah thang jong u mynta la 4 sngi lynter ka ba la sdang naduh ka 23 tarik jymmang, ban pynurlong ïa ka jingdawa ban pynbeit ïa ka Reservation Policy halor ka nongrim ba ka long ka ba noh shilliang.
Ha kine ki saw sngi lada phai sha ka Sorkar MDA, u nongïalam ka jylla u Conrad K Sangma ym shem la don ha ka jylla hynrei na ka liang ki paidbah ha kylleng ka ri Khasi Jaiñtia ki la hiar sha ki ing jong ki nongmihkhmat jong ki ban pynpaw ïa ka jingbynñiaw ïa ka jingsngap jar jong ki.
Kane ka jingpynpaw jingpyrshah ki paidbah ka long kum shibynta ka jingsnohkti lang jong ki paidbah ha ka jingïakhih ka ba u Vah Ardent u la sdang.
Mynta ka sngi la ïohi ïa ki nongshong shnong ka thaiñ East Jaiñtia Hills bad ha Nartiang Constituency ki la mih sha surok ban dawa na ki nongmihkhmat jong ki ba kin shimkhia ban kren halor ka jingdawa.
Kumjuh na ka liang ka VPP Mairang Constitueny mynta ka sngi ka la pynmih ïa ka jingpynbna ba kan pynlong ïa ka jingïakhih da ka ba shong kyllaiñ mongor ha khmat ophis u MLA , ha ka 27 tarik jymmang, kum shibynta ban kyrshan ïa ka jingïakhih u Bah Ardent Miller Basaiawmoit.
Ha ba phai sha ki thaiñ Ribhoi, mynta ka sngi ha Umsning ka la don ka jing ïaid paidbah kaba la pynlong ha Umsning kaba la sdang naduh naduh ka ïing Dorbar shnong ka Umsning bad la pynkut ha khyrdop ïing u MLA u Dr. Celestian Lyngdoh da ka jingthmu ban ïa kynduh markhmat hynrei mar ïa poi ha ïing u MLA ki paidbah ki la sakhi ba ïa ka khyrdop la khang da ka tala khlem da ïoh ban ïa kren, kumta ki paidbah ki la shu pyrta pynrem jur halor ka jingmynthi kaba paw shai ba u MLA jong ka Umsning um kwah ban kyrshan ha kaba ïadei bad ka bhah thungkam haka Jylla.
Kumjuh ha Nongpoh ki paidbah jong ki artylli ki Constituency ki ba kynthup ïaka Umsning bad ka Nongpoh, ki la mih bad rah ïa ki placard bad ka jingpyrta ban dawa ba kum ki MLA ba ki paidbah ki la jied ki dei ban ïa kren bad leh eiei halor ka Reservation Policy, na ka liang u MLA ka nongpoh Constituency u Bah Myralborn Syiem, u la ai pynpaw ïa ka jingkyrshan ïakane ka jingïakhih ka jong ki bad kular ban ïakren bad ka party UDP bad ban rah pat sha ka sorkar.
Kumjuh ki paidbah ki la leit ban tur ruh sha ïing jong u MLA ka West Shillong u Bah Paul Lyngdoh u Myntri ka tnad Sorkar ban ther tyngeh halor ka jingsngap jar jong u halor ka mat jingdawa ban pynbeit noh ïa ka reservation Policy.
Lada phai sha ki nongmihkhmat ha ka Sorkar Synrop MDA mynta ka sngi la ïohi ïa ka jingwan mih ka Myntri ka tnad ka koit ka khiah ha ka jylla ka Kong Ampareen Lyngdoh bad u Bah Alexander L Hek u Myntri ka tnad Animal Husbandary and Veterinary ban ïa kynduh ïa u Bah Ardent Miller Basaiawmoit.
Ha ka 25 tarik Jymmang, na ka liang u General Secreatry ka United Democratic Party (UDP) bad u Bah Jemino Mawthoh bad u Bah Latiplang Kharkongor u MDC ka nongthymmai ki la wan ban ïakynduh bad ai mynsiem ïa u Bah Ardent.
