NONGPOH:
Ban pynïajan ïa ka jingtreikam ha kaba ïadei bad ki hok jong ki paidbah nongshong shnong, ka Meghalaya State Legal Service Authority Shillong ryngkat ka Meghalaya High Court bad ka District Legal Service Authority, Ri Bhoi District Nongpoh kum shi bynta jong ka Pan India Awareness & Outreach, ka la pynlong ïa ka Legal Awareness Campaign ne ban pynsngewthuh paidbah halor ka phang kaba ïadei bad ki hok ki riti jong ki paidbah, ïa kaba ki la pynlong mynta ka sngi ha ka Ïew Mawlasnai, Ri Bhoi District.
Ha katei ka campaign, la ïoh ïa ka jing batai pynshai da ka Kong B. Sten, Advocate Legal Aid Counsel DSLA Shillong ha kaba ka la batai halor ka National Legal Service Authority bad ïaka phang treikam jongka, Ka la pynshai paidbah ruh halor jong ka POCSO Act ka aiñ ban pynshitom ïa kino kino kiba ïuhroit ïa ka hok longbriew manbriew jong ki khyllung khynah kiba hapoh ka 18 snem ka karta.
Ka kong B.Sten ka la ong ruh ba ka jingshongkha khynnah ha kaba ka kynthei ka dang hapoh ka 18 snem ka long beaiñ bad lada jia ba ki bor ka Aiñ ki lap, ki lah ruh wat ban shah kem bad shah pynngat ha kane ka aiñ POCSO.
Shuh shuh ka la pynshai paidbah ruh ha kaba ïadei bad ki lad jingïarap kiba lah ban ïoh lyngba ka District Legal Service Authority (DSLA) ka la ong ba ka DSLA ka dei ka shnat treikam kaba la mang kyrpang ban ïarap ïa ki briew kiba wan na ki longïing kiba duk ba kyrduh ki bymdon lad ban thung ne buh ïa u/ka nongïasaid aiñ na ka bynta ki hok jongki, kumta ka khot ka wer ïa ki paidbah kiba donkam jingïarap ki lah ban leit sha ka Office treikam jong ka DSLA kaba don ha man la ki district.
Ha kaba ïadei bad ka Lok Adalat, ka la ong ba ka dei kawei na ki lad ki lynti ban wanrah ïa ka jingpynïasuk bad ka jingpynkut noh ïa ki mukotduma bad kiwei pat kiba lah ban pynïasuk kat kum ki kyndon aiñ.
Kumta lyngba katei ka campaign, la khot ïa ki paidbah nongshong shnong kiba sngew donkam ba kin mih shakhmat khlem jingriej bad pyndonkam ïa ki lad ki lynti kiba ka sorkar ka buh khnang na ka bynta jongki.
Shuh shuh kane ka campaign ka kynthup ruh ïa ka jingsam ïa ki kot lyngkdop kiba la pynmih da ka Meghalaya State Legal Service Authority Shillong ki ban batai bniah halor ka mat treikam jong ka NALSA, MSLSA, DSLA bad ruh halor jong ki hok jong ki paidbah.
