SHILLONG:
Ka Kong Ampareen Lyngdoh kaba long ka MLA jong ka East Shillong, ka la ong ba ka jingai jingmut jong u myntri rangbah barim ka jylla u Dr. Mukul Sangma ban kem bad aiti ïa ki pulit kiba pynïap ïa ki san ngut ki briew ha ka shnong Mukroh ka long kaba kren pynshit ïa ki nongshnong shnong ha ka jylla.
Haba kren sha ki lad pathai khubor, na ka liang ka Kong Ampareen ka la ong ba ka jingai jingmut jong u Dr. Mukul Sangma ka long tang ban pynshit ïa ki paidbah ha ka jylla. “Ha ka por ba long myntri rangbah u Dr. Mukul bad kum kane ka jingjia ka la jia ha Langpih, hato u la lah ban leh kumba u ai jingmut mynta,” la kylli ka Kong Ampareen.
“Phi la leh ïa kata kaba phi ai jingmut mynta kum ha ka por ba jia ka jingjia ha Langpih? Balei ban pynshit ïa ki paidbah haba phi tip ba kan don ka lynti ka ban hap ban ïaid katkum ka aiñ bad kan don ka ïing kashari ba kan leh ïa kane ka kam. Balei ban kren bad pynkulmar ïa u paidbah,”ka la ong.
“Ha ka por ba jia ha Langpih, u khlem lah ban leit bad kem beit beit ïa kita ki pulit ba siat ïa ki nongshnong shnong ha Langpih namar kam dei kaba suk bad phi mut ban khot ïa ki shipai na Assam bad ban phah hajir sha ka jylla Meghalaya, hato kan ju don kaba kum kata? Kumno phi mut ban kren? Ai ba ka CBI kan ïaid shakhmat bad ynda ïoh ka kaiphod, sa ai ba ka aiñ kan rai katkum ka aiñ,” ka la bynrap.
Ka la bynrap shuh shuh da kaba ong, “ngi dei ki nongïalam kiba la sngewthuh ïa ka aiñ bad ka jylla aiu ka ban shah ba kin wan ban bishar ha kawei pat ka jylla haba ïakren, haba ai jingmut, ai da ka jingmut ba biang ba bit ban ïoh ïa ka result. Lada kwah ka jingbishar hok, kan sa wan bad ym dei ban kren kulmar kum ki nongïalam bad ka jingdawa jong ki, ka long ka ba bakla,” ka la ong.
