SHILLONG:
Kum shi bynta ka wat kaba ar jong ka jingïakren pynbeit pud bad ka Assam, u Symbud Myntri Rangbah u Bah Prestone Tynsong, ha ka 23 tarik Jylliew u la pynlong ka jingïalang bad ka Regional Committee jong ka Ri Bhoi, ha kaba la rai ban pynlong ïa ka jingïalang bad ka Assam ha u bnai ban wan na ka bynta ban leit jurip bad ban bishar bniah ïa ki jaka ba dang sah kiba don hapdeng ka jingïakajia.
“Hadien kata ngi leit lang sha ki jaka bad ngi shim ïa ka rai kaba khatduh halor ka mat jong u pud u sam,” la ong u Bah Prestone.
U la ïathuh ruh ba ha kaba ïadei bad ka Ri Bhoi, yn sa ïakren ïa ki bynta kum ka Budwar, ka Nongwah bad ki jaka ha Block II bad ka Assam.
U la ong ruh ba ka Terms of Reference kan neh kumjuh kumba long ha ka wat kaba nyngkong jong ka jingïakren pynbeit pud.
Haba kylli la ka Meghalaya ka don ïa baroh ki kot ki sla ban pynkhlaiñ ïa ka jingkam jong ka ïa ki jaka ba don ha ka jingïakajia, u Bah Tynsong u la ong ba ka jylla ka don ïa baroh ki kot ki sla ban pynshisha ïa ka jingkam jong ka.
