SHILLONG:
U Executive Member ka KHADC uba dei u MDC ka Mawlai u Bah Teiborlang Pathaw ha ka 28 tarik Nohprah, u la plie ïa ka surok dewbilat ha Mawlai Umjapung, Dong Tariang A kaba la mang na ka pisa ka District Council T. 10 lak tyngka.
Ha kane ka sngi, la sakhi lang u Rangbah Shnong u Bah Herman Dohtdong, u Assistant Rangbah Shnong u Bah AR Manih bad ki riew rangbah. Ka jingjrong kane ka surok dewbilat ka long kumba 100 metre eiei.
Haba kren ha kane ka jingïalang, u Bah Teibor u la ainguh ïa u Blei uba la plie lad ïa u ban pynïoh ïa kane ka jingdonkam jong ka shnong. Watla ka dei kaba rit hynrei kan long ka jingkyrkhu ïa ki paidbah kiba donkam bad un bteng ban pyndep ïa kaba dang sah khamtam lada un poi sha ka thong kum u MLA. “Nga la pyrshang katba lah kum u MDC ban pynïoh ïa ka jingdonkam jong ka Mawlai Umjapung, ka shnong kaba la heh bha”, la ong u Bah Teibor uban ïakhun ïa ka MLA elekshon 2023 na ka NPP na Mawlai konstitwensi.
Ïa kane ka skhim la pynrung jong ka snem 2021-22 bad kane ka dei ka bynta kaba nyngkong bad ka bynta kaba ar, yn sa lah ban pyndep haduh ban kut ka surok. “Kane kam dei ka skhim ban pynbiej elekshon hynrei nga pyndep ïa ka kamram kum u MDC”, la ong u Bah Teibor.
U la ïathuh ba ka skhim 100 sngi ne National Rural Employment Guarantee Scheme (NREGS) kan sdang noh ban treikam ha u bnai Ïaïong u snem ban wan bad ynda la wan kane, kan long ka jingkyrkhuh ïa ka shnong ban ïoh jingmyntoi ki paidbah.
Haba pynpaw ba u la kut jingmut ban trei ïa ka jingdonkam ki paidbah, u Bah Teibor ula ong ba kum u MDC um thiah sngi bad lada ibit u Blei ban kyntiew kyrdan kum u MLA ha 2023, un sa pyrshang ban wanrah shuh ki kam ba kham heh. Nalor ka madan ïalehkai, ka umbam umdih ruh ka dei kawei kaba donkam eh ki paidbah katei ka shnong, ha kaba u la ïakhun ban pynrung ïa ka skhim Jal Jeevan Mission (JJM) ban sam um sha man ki thliew ïing.
