SHILLONG:
Ka Ïing Bishar ba ha khlieh duh jong ka ri, ka Supreme Court ha ka 10 tarik Ïaïong ka la ïathuh ba kan don ka jingbishar ha kaba ïadei bad ka mukotduma ïasoi soskular pynbeit pud hapdeng ka Meghalaya bad Assam ban pynkut noh ïa ka jingïakajia pud hapdeng jong kitei ki artylli ki jylla bamarjan.
Ka Ïing Bishar Supreme Court Bench kaba kynthup ïa u nongbishar ba ha khlieh duh, u Chief Justice jong ka ri India, u D.Y. Chandrachud bad ïa kiwei ki arngut ki nongbishar, kata u nongbishar P.S. Narasimha bad u nongbishar JB Pardiwala, ka la ong ba ka jingbishar ïa ka ne ka mukotduma yn shim ha u Naitung mynta u snem. Ka Division Bench jong ka Ïing Bishar Supreme Court ka la ong, “Ïa kane ka kam ngi rah sha u ‘Naitung”.
Ka Sorkar Meghalaya ka la buh ïa ka jingkyrpad jong ka hakhmat jong ka Ïing Bishar Supreme Court ban pyrshah ïa ka hukum jong ka Ïing Bishar Meghalaya High Court, kaba la pynsangeh ïa ka jingïasoi soskular pynbeit pud hapdeng ka Meghalaya bad Assam. Ka Ïing Bishar Meghalaya High Court ha ka 8 tarik u Nohprah, 2022, ka la pynsangeh shipor ïa ka jingpyntreikam ïa ka jingïasoi soskular pynbeit pud hapdeng ka Assam bad Meghalaya.
Ïa kane ka jingïasoi soskular pynbeit pud la soi da u Myntri Rangbah ka Meghalaya, u Conrad K. Sangma bad u Myntri Rangbah jong ka Assam, u Himanta Biswa Sarma ban ïa pynbeit ïa ka jingïakajia pud hapdeng jong kine ki artylli ki jylla, kaba la neh mynta la bun bun snem, ha ki hynriew tylli ki jaka ba don ka jingïakam pud hapdengka Meghalaya bad Assam.
Ka Sorkar Meghalaya haba ka la tied ïa ki jingkhang jong ka Ïing Bishar Supreme Court pyyrshah ïa ka hukum jong ka Ïing Bishar High Court, ka la ong ka jingïapynbeit pud pynbeit sam lane ka jingïakylliang jaka hapdeng jong kine ki artylli ki jylla, ka dei ka kam saiñ hima sima bad kane ka hap beit ha ka jingpeit jingjngoh jong ka Sorkar. U Myntri Rangbah ka Meghalaya, u Conrad K. Sangma bad u Myntri Rangbah ka Assam, u Himanta Biswa Sarma ha ka snem ba la dep ki la ïasoi ïa ka soskular pynbeit pud ha ki hynriew tylli ki jaka ba kine ki artylli ki jylla ki ïa kam longtrai ïa kitei ki jaka khappud ha ki khadar tylli ki shnong ki thaw, kiba la wanrah ïa ki jingïakynad hapdeng jong kine ki artylli ki jylla.
Ha ka 29 tarik u Lber, 2022, kine ki arngut ki Myntri Rangbah jong ki ar jylla, kata u Conrad K. Sangma bad u Himanta Biswa Sarma ki la ïasoi ïa ka soskular pynbeit pud hakhmat jong u Myntri kam poh ïing jong ka ri India, u Amit Shah. Kane ka jingïasoi soskular hapdeng jong kine ki artylli ki jylla, haduh 844.9 Sq. Km shilynter jong u pud u sam hapdeng jong ka Meghalaya bad ka Assam.
Kine ki artylli ki jylla bamarjan kim shym la lah ban ïapynbeit ïa u pud u sam mynta la 50 snem. Hynrei, dei tang mynta katno ba ka sorkar jylla ka la pyrshang ban pynbeit ïa kane ka jingeh. Ka Meghalaya la dkhat na ka Sorkar Assam ba kan long ka jylla bapura ha u snem 1972. Ka Meghalaya kam shym la treh ban mynjur ïa ka Assam Regorganization Act-1971 bad kane ka la ïalam sha ka jingïakajia pud hapdeng ka Meghalaya bad Assam.
