SHILLONG:
U Myntri ba dei peit ïa ka kam jngohkai u Bah Paul Lyngdoh ha ka 19 tarik Ïaïong u la ong ba ka sorkar khot tender noh ban shna ïa ka Shillong Ropeway Project (SRP) ha u bnai Jymmang bad ïa ka jingtrei yn sdang la kumno kumno ha u bnai Naiwieng mynta u snem.
Haba kren sha ki lad pathai khubor u Bah Paul u la pyntip ba ka Shillong Ropeway Project kan sdang naduh ka Madan Laban shaduh Lumparing ter ter shaduh u Lum Shillong (Shillong Peak) view point.
“Ka Shillong Ropeway Project kan don 12 tylli ki cable ha kaba sdang bad ki Engineer kin shna ha ka rukom kumba leh ki nong European”, la ong u Bah Paul
U Bah Paul u la ong ba kane ka projek jong ka Shillong International Centre for Performing Arts & Culture (SICPAC) kaba la plie ha u snem ba la dep, kim pat aiti sha ka sorkar haduh mynta. U la ong ba na ka liang ka sorkar kan shim ïa ka sienjam ban pynthikna ba kane ka projek jong ks SICPAC kin aiti noh sha ka sorkar jylla.
U Bah Paul u la ong ba ka SICPAC, ba ïa ka kyrteng ruh yn pynkylla, kaban long ka theatre kaba heh duh hapoh ka thaiñ shatei lam mihngi, kaba don ïa ka jingheh kaba ngiam haduh 1700 ki briew, kaba long kum kawei ka mawjam na ka bynta ka jylla.
U Bah Paul u la ïathuh, “Ha ka por ba ngi leit ban jurip ïa kane ka SICPAC, ngi lap shibun ki jingduna bad kam long kumba la kren bad la ïoh, kumta ngin pyrshang ban pynïasoh ïa kane ka jingduna, kynthup ïa ka jingpynkylla kyrteng jong kane ka facility”.
U la pyntip ruh ba ka tnad kam jngohkai ryngkat bad ka Asian Development Bank (ADB), kan sdang ïa ka prokjek ba thymmai ha baroh kawei ka jylla, ha kaba ka jingmang tyngka ka long kumba T,70 klur na ka bynta ka Shillong bad Sohra.
