MAWKYRWAT:
Ka kynhun nong niah thuk thuk jong ka jylla Meghalaya bala tip kum ka ‘The Ultimate Legend Bikers Association’ (TULBA) Central Body mynta ka sngi ka 6 tarik u Jymmang 2023 ki la ïoh ban pynskhem ïa ki nongkitkam ba thymmai jong ka seng naka bynta ka samoi treikam jong u snem 2023-2026 ha kaba ïa kane ka jingïalang kila pynlong ha Lawmali Dorbar Hall East Khasi Hills District.
U TBn Powel Sohkhlet haba kren kum u kongsan u la pynpaw ka jingsngewnguh ba kum ka seng TULBA ka kynmaw burom ïa u ba khot kyrpang ha kane ka sngi da kaba pyn kynmaw ruh ïa ki kam ba khraw ba kum ka seng TULBA ka la noh synñiang ha ka imlang sahlang kum ki dkhot jong ka seng ki don kata ka mynsiem ban kner lem ki jingïarap da kaba kila trei shitrhem lyngba ki buit ki bor jongki ha ki ba bun ki bynta da kaba ki la lah ruh ban pynshna ïing ia ki longïing ba duk ym tang kata la ïohi ruh ba ki la kner ruh ki jingai sngewbha haka por Christmas bad ruh haka por ba ka jylla Meghalaya ka ïoh mad ïa ka jingpang Covid 19 ha kine ki snem bala dep. Ka jingdon ka TULBA da kaba pynshna ïing ei ia kiba duk ka dei ka bynta kaba khraw tam. Ai ba kine ki nong kitkam ba thymmai ban sa shimti kum ki nongïalam jong ka seng kin nang pyntyllun shuh shuh ïaki kam da ka kti kaba hok bad daka jingiatylli baroh kum ki dkhot khnang ba ka seng kan nang lah ban leh ïa shibun ki kam nangne shakmat naka bynta ka imlang sahlang.
U bah Seiborlang Lyngdoh Nonglait u ba dei u president ba la shongthait jong ka seng u ba dei ruh u nongseng ba nyngkong ïa kane ka TULBA ha ryngkat kiwei de ki dkhot u la pynshai ïaki mat treikam jong seng naduh ba la seng ïaka naduh u snem 2011 ha duh ban da kynjoh mynta u snem 2023 .
U la ong ruh ba ka jingthmu jong kane ka seng TULBA ka long ban lum ban lang ïa ki samla kiba ñiah ar shaka ( Bikers)ban ki dei ban leh don akor ba kim dei ban dih ki kynja jingdih ba pynbuaid haka por ba ki ñiah Bike bad ymdei ruh ban ñiah khlemakor da kaba pynher sted ïa ki bike jong ki ha surok bad ruh kaba kongsan ka long ban noh synñiang lem ïaka imlang sah lang ban leh eiei ïaki lanot ba shem jingeh kiba donkam jingïarap.
Halor ka jingiehnoh ïaka kam kum u nongïalam ba ha khlieh duh jong ka seng, u la ong, “Nga sngewbynnud ha kawei ka bynta bad nga sngewkmen ruh ba kane ka seng kala hikai ïa u ba long kum u nongïalam ban lah ban kitkhlieh ïaki jingeh baroh haduh ba kane ka seng TULBA ka la paw ym tang hangne hapoh ja jylla Meghalaya hynrei ha kiwei pat ki jylla ki briew ki la ithuh bad tip ïaki kam ba ka seng TULBA kala noh synñiang ha ka imlang sahlang”, ong u bah Seiborlang Lyngdoh Nonglait.
Shuh shuh u la ong ruh ba ka por kam shah shuh ïa u ba u dang bat sah ïaka kam kum u nongïalam namar bun ki nongkitkam jong ka seng kila biang ka bor kumta nga la sngew dei ban ailad noh sa ïa kiwei ki para dkhot ban long ki nongïalam namar ba ma u, u la bat ïa ka kyrdan kum u President naduh ba la seng ïa ka TULBA ha ka jingïaid lynti ka la kynjoh la kumba 10 snem tam eiei, kumta ka la dei ka por ban shongthait ban ailad ïa ki dkhot bad ïa ki nongkitkam ba thymmai ban kin shimti ban pyntyllun iaki kam jong ka seng. “Wat la ngam long shuh kum u President hynrei ka mynsiem ka don bad ka seng bad ngan iai trei ryngkat bad ka seng namar ba kane ka seng kaba la hikai ianga haduh ba nga long kumne kumba nga long mynta”, u la ong.
Ki nongkitkam ba thymmai ha kane ka shlem trei kam jong ka seng TULBA Central Body naka bynta u snem 2023-2026 la ioh President da u Bah Rishandon Nongrum, Bah Odicios Shullai kum u Vice President, Working President Bah Kyrshanlang Nongbri, Secretary Bah Banbhalang Mawiong, Organising Secretary Bah Richbemous Rani, Finance Secretary Bah Meshak Sungoh, Sports Secretary Bah Franky Nongrum, Social Secretary Bah Jershai Marbaniang, Public Secretary Bah Samuel Kurbah, Education Secretary Bah Shestar Kharbani bad ki ar ngut ki Co-ordinator u Pastor Lamborne Kharbudon bad Bah Splendour Sawkmie.
Ki Dkhot Executive Committee Bah Bympher Lyndem, Evandor L.Nongpyiur bad Bah Wankit Nongkynrih.
La pyniaid iaka jingialang da u Bah P.S Lyngdoh, katba u Tymmenbasan Powel Sohkhlet u la shim ia ka bynta ban pyntian smai iaki dkhot ba thymmai jong ka seng TULBA Central Body naka bynta u snem 2023-2026 da kaba buh ruh da ka ki jingduwai.
Ha kane ka sngi la ioh ruh ka jingkren na u President barim Bah Seiborlang L.Nonglait bad kumjuh ruh na u Bah Rishandon Nongrum President ba thymmai jong ka seng ha kaba ka jingialang kala iaid beit iaid ryntih lyngba da ka jingwan iashim bynta lang ki dkhot naki Unit bapher bapher kiba la wan na kylleng jong ka jylla Meghalaya.
