MAWKYRWAT:
U Bah T.Lyngwa IAS Deputy Comissioner South West Khasi Hills District ha ba kren kum u kongsan haka sngi rakhe kyrpang jong ka World Environment Day ha Mawkyrwat u la ong ba ha baroh shi tyllup ka pyrthei kumba 40 Million ton la pynmih plastic ha manla u snem bad lada ki briew kim bang ban pyndonkam ïaki tang ha dien 40 snem ki plastic kin sa dap lut ha ki wah, ki khlaw ki shnong wat hapoh ki kamra iing jong ngi ki briew. Namarkata u la kyntu ïa ki paidbah nongpyndonkam ïa ki kynja plastic ba kim dei ban bret pathar ïa ki ba kin nang ban pyndonkam ïa ki da kaba sait khuid biang ïa kita ki plastic ban pyndonkam da ki juh haba ki leit siew sha iew da kane ka lynti ngi lah ban pynduna ïaka jingbun ki plastic. Shuh shuh u la ong ruh ba kane ka jingrakhe don burom ïa kane ka sngi ka 5tarik Jylliew kaba la tip baroh shi tyllup ka pyrthei kum ka World Environment Day ka long ruh ka bynta ban ai jinghikai ïa ki khynnah ban kynmaw pateng la pateng ba ngi dei ban burom ïa ka mariang kaba ma ngi ngi im lyngba jongka.
U Bah G.D. Kharwanlang SP jong ka Mawkyrwat u la ong ba ka kamram jong ngi ki briew ymdei tang ban thung ïa ki dieng hynrei kaba kongsan ngi dei ban sumar ïa ki. U la ong ruh ba ha ki 50 snem ki ban sawan lada ki briew kim ñiewkor ïa ki khlaw ki btap bad ruh ïa ki wahduid kan sa poi ka por kaba ka thma kaba kham khraw ka dei ka jingkyrduh um, ha kaba ki briew ha kane ka sla pyrthei tang na ka bynta ka jingkyrduh um kan sa long ka thma bah. Namarkata ha shwa ban poi kata ka por ka mynta kaba donkam tam ba ngin burom da kaba tyngkai ïa ka mei mariang.
Ha kane ka sngi kynmaw burom ïaka mariang ha Mawkyrwat la pynlong da ka ophis jong u Divisional Forest Officer Social Forestry & Territorial Division South West Khasi Hills District ha ryngkat daka jingïatrei lang bad ka ophis jong ka District Admistration South West Khasi Hills District Mawkyrwat da kaba buh ruh ïa ka phang “Beat Plastic Pollution” bala pynlong ha Mini Secretariat Mawkyrwat.
Ha kane ka sngi kyrpang jong ka World Environment Day naka liang ka ophis jong u Divisional Forest Officer lyngba u Dr. G.H. Chyrmang u la ioh ruh ban pyn i ïa ka phlim lyngkot ( Documentary flim) ha kaba ïa dei bad ka juk ba mynta ba ki briew kila pynjot ïa ka mariang ha kiba bun ki bynta,da kaba ki pyndonkam ïa ka Plastic, ki jing don ki kharkhana ( Factory) ka jing pom ïaki khlaw kumjuh ruh ka jingtih ïa ki marpoh khyndew, ka jingwanrah ka jingjakhlia ki um ki wah.
Lyngba kane ka phlim lyngkot ka la ioh jinghikai shibun khamtam ïa ki khynnah skul ki rangbah kiba la wan ïa shim bynta ha kane ka sngi.
Ha shwa ban leit thung dieng la ioh ban pynlong ka jingïalang kaba lyngkot ha kaba la ioh ka jingkren na ka Kong S.Kharsahnoh DSEO, SWKHD Bah G.D. Kharwanlang Supritendent of Police Mawkyrwat bad ka jingkren na u Bah T. Lyngwa IAS Deputy Comissioner South West Khasi Hills District kum u kongsan la ïa donlang ruh kiwei de ki ophisar sorkar ki myntri shong ki nonghikai bad ki khynnah skul na ka thaiñ Mawkyrwat.
