SHILLONG:
U Paiem Ainam Manik Syiem ha ka 9 tarik Lber u la shimti ïa ka khet kum u syiem ba pura jong ka Hima Mylliem ha ka jingïadon lang ki bakhraw ba tri jong ka Hima.
Ka Hima Mylliem kam don ïa u Syiem ba pura mynta la 7 snem kynthih, bad u Paiem Ainam Manik Syiem un long u syiem pura uba 13 u ban shynshar ïa ka Hima Mylliem.
Ha kane ka sngi u CEM ka KHADC u Bah Titosstar W Chyne, u la aiti ïa ka sanat ha u paiem Ainam Manik Syiem ban pynskhem ïa ka jinglong syiem ba pura, da kaba pule ruh ïa ka kyndon (5) jong ka Mylliem Syiemship Act 2007.
Haba kren ha kane ka sngi u Bah Titosstar u la ong, “Kumba phi tip ki kam ki jam ha ka Hima Mylliem la bun bun snem ka long kaba ïaid da ki kynrum kynram, la don ki jingjia sngewsih ki jingjia ki ba la pynhiar kyrdan ïa ka burom jong kane ka Hima”.
“Na kata ka daw ngi kum ka EC naduh ba ngi la shimti, ka thong jong ngi ka long ban pynïaid beit ïa ki Hima kiba don hapoh ka KHADC namar ki paidbah ki la duh ïa ka jingshaniah na ka jingpynlong kamkai bad pynhiar kyrdan ïa ka iktiar ba ngi la ïoh”, u la bynrap.
U la pynpaw ïa ka jingshaniah ha u Paiem Ainam Manik Syiem, u ba la shimti kum u syiem ba pura ha kane ka sngi.
U Paiem Ainam Manik Syiem u la ong, “Nga dei uwei na ki syiem u ba dang khynnah tam bad ka long ka sngi ka ban sah kynmaw pateng ngin ïa trei ryngkat bad ka KHADC ban ngin ym ïaid lait haba don kano kano ka jingeh ngin ïatreilang”.
