TURA:
Ki por ba dum jong ki snem ba la dep, sa shisien ka khlam Covid ka pynsyier ba kan wan biang mar syn pynjlan ki briew ïalade na ki jingsop jingspaiñ katba kane ka khlam ka dang kiew ha ki ri ba marjan ha ki bnai ba la dep.
Hadien 2 snem kynthih ka Garo Hills ka la sakhi ïa ka jingïap jong uwei u briew na ka Covid ha Tura, ha kaba uwei u briew ba dang 41 snem ka rta u la ïohi ïa ki dak ki shin jong kane ka jingshitom ha ka 21 tarik Ïaïong ïa kaba u dang shah sumar ha Holy Cross hospital, Tura.
Une u briew ba la khlad noh u dei na ki thaiñ New Bhaitbari jong ka West Garo Hills.
Katkum ka jingïathuh ki doktor, la wankit ïa u sha Tura bad u la shah sumar ha Holy Cross Hospital mynta la 5 sngi kynthih.
La ïoh jingtip ba u la ud ba u sngew shitom ha ka rukom ring mynsiem bad ka jingshit, kaba long ruh ka dak jong kane ka jingshitom. Hadien ba la dep leh ïa ka test, ka resol ba la ïoh ka paw ba u don ïa u khñiang Covid.
Shuh shuh, ka don ka jingartatien ba u la dep ban shim ïa u tika Covid watla ki bahaïing hasem ki kam ba u la dep ïoh ïa u tika ai jingïada.
Ha ka por jong ka Khlam Covid, khamtam ha ka sien kaba ar kaba la ktah jur bha ïa ka ri kata ha u snem 2021, la ïoh lum da ki spah tylli ki case ha ka jylla ba kynthup ruh ha Garo Hills bad ka jingïap na u Covid ka la kiew bha khamtam ha kito kiba don lypa ïa ka jingshitom ha ka met kum ka diabetes, blood pressure, bad kiwei kiwei ki jingshitom.
