SHILLONG:
U Presesident ka Voice of the People Party (VPP) u Bah Ardent Miller Basaiawmoit, u la ong ba hadien ba la urlong ka jingdawa ban phah pynbeit ïa ka Reservation Policy ka VPP mynta kan kthong sa ïa ka kam bamsap ha ka jylla.
U Bah Ardent Miller Basaiawmoit u la ong ba ka VPP, nangne shakhmat kan sa phah da ka jingthoh sha ka sorkar ban pynthikna ba ka MPSC bad ka BSC kin don da ki briew ki bym shah pynïaid ha ki briew jong ki seng saiñpyrthei, dei ban buh da ki briew ki ba biang bad pynthikna ban ym don mano mano ba lah ban pynduh ïa ka hok jong ki samla wad kam jong ngi.
“Ngi tip ba katne snem kam ju don ka jingleh hok ha kine ki lynti dei na kata ka daw ba ki samla jong ngi ki ngop ha ki kam sniew ngin buddien ban pynjanai ïa ki lad thungkam thungjam”, u la bynrap.
U la ong shuh shuh, “Ka party kan dang donkam shibun kiei kiei ba kan khyllie, kumba ka long mynta ka long ka ba sngewsih ban peit ïa ka MCCL kaba la khyllem namar ka bam sap bad ka thma ka ban bud mynta kan long ïa ka bamsap ha ka jylla”.
“Ha ryngkat u paidbah ngin thoh sha ka sorkar ba ka dei ban weng mardor ïa ki Chairman ki ba long tang ki jingpynlut phut ïa ka pisa u paidbah, ki dei ban weng ïa ki nongai jingmut ki ba la shu siew da ka pisa u paidbah khlem don jingmyntoi ïa u paidbah” u la bynrap.
U la ong ba ïa ka pisa ka ba ki siew da ki lak kin thaw ïa ka lynti ban thaw ki kam ki jam ïa ki khun samla, ban kyntiew ïa ka ïoh ka kot bad ka jingeh ki nongshong shnong.
“Kane ka dei ka tang ka jingsdang jong ka jingjop, lada u paidbah u la long u ba pynkhreh kumba ngi long mynta yn jop beit ha kano kano ka jingïaleh bad ki paidbah ki dei ban long ki ba la pynkhreh lada ka VPP kan khot ha kano kano ka por”, u la ong.
