SHILLONG:
U heh pulit ba la shah sospon, u Bah GK Iangrai, uba la shah pyllait jamin noh na District Jail ha ka miet jong ka 30 tarik Lber, u la shah sumar ha ka hospital hapoh sor Shillong, hadien ba u la ud pang na ki katto katne ki jingshitom.
U nongïasaid aiñ jong u Bah Iangrai, u Phuyo Yobin, ha ka 31 tarik Lber u la ong, “La pyllait jamin noh ïa u Bah Iangrai na baroh ki mukotduma da ka District Court bad ngi la lah ban pyllait noh ïa u na district jail kaba la tip kum ka correctional home hynnin ka miet.”
U Bah Iangrai uba dei u Assistant Inspector General (AIG) ba rim ka Meghalaya Police, u la shah kem ha ka 2 tarik Naiwieng 2022 ha kaba ïadei bad ki ar tylli ki mukotduma halor ka Nationwide Emergency Response System (NERS) bad ka dry ration supply, bad hadien kata, katkum ka kaiphod jingtohkit, saw tylli kiwei pat ki jingujor la ujor pyrshah ïa u, kawei na kita ka dei halor ka jingthied bad ka jingpyndonkam ïa ki kali pulit.
“Ka CID ka la registar lai tylli ki case pyrshah ïa u bad ki la pyrshang katba lah ban kem ïa u. Ki la pan ruh da ka jingthoh na ka district court ban kem ïa u, hynrei ngi la lah ban ïakhun pyrshah ïa kata bad ngi la pan pyllait jamin noh ha baroh lai tylli ki case,” la ong u Yobin.
Katkum ka jingïathuh u Yobin, haduh mynta la registar hynriew tylli ki case pyrshah ïa u Bah Iangrai, hynrei ym shym la ïoh kano kano ka jingthoh ne ka charge-sheet ha baroh hynriew tylli ki case.
“Bun na ki case ki dang don ha ka bynta kaba sdang jong ka jingtohkit. Ki pulit kin tohkit ïa kita ki case, hynrei u Bah Iangrai u la ai ka jingpynthikna ha ka ïingkashari ba un ym phet. U la ju ai ka jingïatrei lang bad ka jingtohkit bad un ïai leh ruh ïa kata,” la ong u Yobin.
Haba kylli hato u Bah Iangrai un dang shah kem biang, u Yobin u la ong em. “Ha kano kano ka bynta kaba ki la pynkit ïa u, la dep ban ujor lut, na kata ka daw ngam ïohi sa ha kino ki bynta ba ki dang lah ban pynkit ïa u. Kumta ka lad ba kin kem biang ïa u ka rit,” u la bynrap.
Haba kylli halor ka buit ïada jong ki, u Yobin u la ong ba ïa mynta kim don jingtip halor ki sakhi sabut kiba u Investigating Officer u lum pyrshah ïa u Bah Iangrai. “Kumta mynta ka dang kloi palat ban pynkhreh lypa. Ynda ki la ai ha ngi ïa ka jingthoh (charge-sheet), ngin lah ban sngewthuh hangno ka jingïada jong ngi ka shong. Ïa mynta ka dang don ha ki bynta kiba sdang jong ka jingtohkit bad ngim lah ban ïathuh eiei halor kane,” la ong u Yobin.
