NONGSTOIÑ:
Ka jingangnud kaba la slem bah jong ki paidbah ka thaiñ Rambrai ban ïoh noh ïa ka C&RD Block kala wan urlong mynta ka sngi hadien ba u Myntri Rangbah ka Jylla u Conrad K Sangma u la buh ïa u Mawnongrim ïa ka Rambrai C&RD Block.
“Ngin wan hangne tang ban shu buh lane plie tang ïa u maw nongrim hynrei ka Block kan sdang ban treikam naduh mynta ka sngi bad u BDO ruh un shong naduh mynta hi ka sngi”, la ong u Conrad haba ai jingkren ha katei ka jingïalang. U la ong ruh ba ban pynwandur bha ïa ka jingtreikam lehse kan dang shimpor kumba katto katne bnai hynrei u la kyntu ïa ka tnad C&RD bad ïa u BDO lem bad ïa u DC ba ka Rambrai Block kadei ban treikam pura noh nadong shadong kum ka Block kaba pura.
Shuh shuh u Conrad u la ong ba ka sorkar MDA kaba la ïalam da ka NPP kadei ka sorkar jong u paidbah bad ka jingplie ïa ka Rambrai Block kan long ka sien jam ïa ka roi ka par bad ka jingkyrkhu ïa ki shnog ki thaw hapoh ka thaiñ Rambrai.
U la ong ruh ba ki C&RD Block ki dei kiba kongsan tam ban ai ka jingshakri ïa u paidbah ha ka roi ka par bad ha ki skhim bapher bapher hapoh ka Jylla Meghalaya, kumta ka long kaba donkam haduh katta katta ban pynsuk ïa ki paidbah ban poi sha ki ophis Block ha manla ki kyndong kynshrot jong ka Jylla.
“Ki paidbah ka thain Rambrai ha ki por ba la leit ki hap ban ïaid ïa ki lynti kiba jngai ban poi sha ki ophis Block hynrei lyngba ka jingïoh ban plie noh ïa ka Block ha Rambrai kan wanrah ka jingïajan hapdeng u paidbah bad ka Block” u la ong u Conrad.
U Myntri Rangbah u la ong ruh ba ka sorkar la mang T.3 klur shiteng na ka bynta ban shna ïa ka surok na Mawrang sha Rambrai kaba jngai kumba 2 KM shiteng bad u la pynbna ruh ba ka sorkar kan kyntiew kyrdan noh ïa ka Rambrai PHC sha ka CHC bad ïa kane yn sa plie shen.
Ha kane kajuh ka jingïalang u Myntri Rangbah u la ïoh ruh ban sam ïa ki lad jingïarap sha ki nongïoh bynta kiba dei ki nongpynmihg mar bad ki ïa ki nongrep lyngba ka skhim FOCUS bad FOCUS PLUS bad la ïoh ruh ban sam ïa ki sniang bad syiar bad kumjuh ki song pisa sha ki kynhun treimon sngewbha jong ki longkmie ne ki SHG lyngba ka Yess Meghalaya.
