NONGPOH:
Ar-sngi hadien ba ki paidbah ki la lap ïa ka Khlieh u Rangbah kaba la per harud ka Pung Umiam, ha ka 8 tarik Lber ki paidbah ki la lap sa ïa ka Kti kaba la per ha sla um bad kumjuh ruh la lap sa ïa ka met, kaba la tep ha khyndew harud ka pung Umiam.
Hadien ba la lap ïa ka Met bad kti, ki pulit ka Ri Bhoi, ha ryngkat ka jingdon kiba haïing lem bad ki briew na ka shnong, ha ka 9 tarik Lber ki la leit ban shimti noh ïa ka met jong utei u rangbah bad ban leh ïa kaba donkam baroh kiba katkum ki kyndon Aiñ.
Ïa utei u rangbah, uba la shah pynïap dusmon ha ki riew thrang snam, la wan ban bret ha katei ka jaka, la tip kum u Bah Omeka Myrthong na ka shnong Mawlaingut, East Khasi Hills bad uba dei ruh u rangbah uba la don 5 ngut ki khun.
Ka rukom shah pynïap ïa utei u rangbah, ka la long kaba itriem haduh katta katta, ha kaba ki runar, ki la Khrai na Ryndang, nalor kata ki la khet ruh ïa ka kti, ha kaba ki runar ki sa leit ban bret hapoh katei ka pung Umiam.
Katkum ka jingïathuh da u Bah Saindor Nongbsap, Secretary Shnong Mawlaingut, u la ong ba katkum ka jingïathuh da kiba haïing jong utei u rangbah ba la shah pynïap, la ong ba u la jah na shnong naduh ka 26 tarik Rymphang, ha kaba ka shnong hadien ba ki la ïoh jingtip halor katei ka jingjah utei u rangbah, na ka liang ka shnong, ki la pyrshang ban wad ïa u, hynrei kim lap satia, tad haduh ba kiba haïing ki la lap ïa u na katei ka Pung Umiam.
Utei u nongïalam jong katei ka shnong, u la ong ruh ba utei u rangbah, u dei u briew uba bha bad ba um don kano kano ka dak sniew ha shnong ha thaw, namar u dei u briew uba kloi ban ïatreilang bad ki bor shnong bor thaw.
Namarkata, na ka liang ka shnong ka pynrem jur ïa ki runar, kiba la donkti ha ka ban pynïap dusmon ïa utei u rangbah bad kiba la dawa ruh ïa ka tnat pulit ba ki dei ban shimkhia, ha ka ban thwet ïa ki runar bad ban ai ïa ka jingpynsaja kaba tyngeh, khnang ba kiba kum kitei ki jingjia kin nym jia shuh nangne shakhmat.
