SHILLONG:
U MLA ka Congress na Umsning konstitwensi, u Dr. Celestine Lyngdoh ha ka 6 tarik Jylliew u la buh jingkylli la ka jingdawa jong ka seng Voice of the People Party (VPP) ban khmih ïa ka Reservation Policy kan ai jingmyntoi ïa ka jaitbynriew Khasi Jaiñtia lane la kan ktah pynban ïa ki.
U la kren ïa kine ha ka por ba dang ai jingkren ha ka jingïalang paidbah kaba la long ha Umsning hynnin ka sngi ban pynshai sha ki paidbah halor ka jingsngew jong u haba ïadei bad kane ka mat kaba thnem bha mynta.
Haba pdiang ïa ka rai jong ka sorkar ban thung da ka komiti jong ki riewstad lane ka “Expert Committee” ban bishar bad pule sani bha shaphang ka mat Reservation Policy, u Dr. Celestine u la ong ba kane ka dei ka mat kaba donkam ban da pule jylliew bad bishar bniah bha bad ym ban shu kyntu ïa ki paidbhur ban mih paidbah bad ban shu shah thngan.
Haba khot ïa ki nongïalam ka seng VPP kibym lah ban ïaishah, u nongïalam ka seng Congress u la ong ba ka jingïakhih jong ki nongïalam ka VPP ka long ban dawa khmih ïa ka bhah thungkam thungjam hynrei kat haduh mynta, kim long kiba shai haba ïadei bad ka jingdawa jong ki.
“La kan ai jingmyntoi ïa ki jaitbynriew Khasi bad Jaiñtia lane la kan long pynban ka jingma ïa ki?” la buh jingkylli u Dr.Celestine
Shuh shuh u la bynrap ba ka jingshah thngan ba la pynlong da u president ka seng VPP, u Bah Ardent Miller Basaiawmoit ban dawa khmih ïa ka Reservation Policy ka long ka jingkhring ïa u paidbah.
Hynrei kane kam don jingshai halor ka jingdawa. “Ha kano ka nongrim la pynlong ïa kane ka jingdawa?” u la kylli shuh shuh la ka jingmut ka long ba baroh lai jaitbynriew, kata ki Khasi, Jaiñtia bad Garo kin ïakhun kyllum ha ka shatri jong 80 per cent kyllum lang kawei, ne ki kwah ba ka bhah ka dei ban kham noh liang sha ka jaitbynriew Khasi – Jaiñtia.
Haba maham ïa ki paidbah, u Bah Celestine u la kylli, “Kan jia aïu pat lada kan korbar sa ka Ïing Bishar bad kan bhah noh tang 60 per cent ïa baroh lai jaitbynriew bad kaba sah 40 per cent kan leit sha ki unreserved?”
“Ka Expert Committee ba la thaw da ka sorkar jylla kam lah ban ïaid lait ïa ka Mandal Commission Reports kaba ïadei bad ki Ïing Bishar High Court bad Supreme Court ha kaba ka la kdew shai ba kan ym don kano kano ka jaitbynriew ka ba lah ban ïoh 50 per cent reservation, “hynrei ha Meghalaya, ki jaitbynriew Khasi, Jaiñtia bad Garo ki ïoh 80 per cent,” u la ong
U la kdew shuh shuh ruh ba shen hadien ba ka VPP ka la weng ïa ka jingïakhih, u MLA ka Rajabala konstitwensi u Dr.Azad Zaman u la pynpaw ïa ka jingdawa ba shonghok na bynta ki Unreserved ruh kumjuh.
U la ong ba kane ka mat ka long kaba donkam ban phikir bha namar lada ym leh da ka jingsngewthuh bad jingpyrkhat ka lah ban wanrah ka jingbym sngewthuh jingmut hapdeng ki jaitbynriew bapher bapher jong ka jylla kaba phuh ba phieng.
