SHILLONG:
Uwei u nongñiah trok kit masi u ba dang 34 snem ka rta, ha ka miet jong ka 5 tarik Jymmang u la shah siat ïap ha ki shipai Border Security Forces (BSF) ha ka surok Pynursla-Dawki hajan ka shnong Mawshun ha Pynursla.
Haba pynthikna ïa kane ka jingjia, u Superintendent of Police, East Khasi Hills, u Bah S Nongtnger u la ïathuh ba la pynrung ïa kane ka case ha Pynursla police station bad u la ong ba ki pulit ki dang don ha ka jaka ba jia ka jingshah siat khnang ban pynlong ïa ka jingtohkit.
Une u rangbah ba la shah siat ïap la tip kyrteng kum u Bah Roning Nongkynrih u ba na ka shnong Jalynteng ba hap hapoh ka Raid Nongkynrih, East Khasi Hills district.
Katkum ka jingïathuh u nongbud jong kane ka trok,u ba la kam ba u dei u para jong u Bah Roning, u la ïathuh ba ki dang don ha ka lynti ban wanphai na Laitlyngkot ban wan buh ïa ki masi jong ki ha kawei ka jaka ha Pynursla ha kaba la lap ïa ki da ki shipai BSF ki ba la knieh lynti ïa ki ban pynsahngeh kham jngai khyndiat na ka trok jong ki.
“Ha kata ka por, la hiar uwei u shipai na ka trok jong ki bad dei ha kane ka por ba la jia ka jingshah siat. Ka dei ha ka por kumba 11 baje mynmiet. Hadien katto katne ka jingshah siat, haba nga peit ïa u hynmen lajong nga shem ba u la lyngkien da ka snam bad um khih shuh. Nga la shu kdup skhem beit ïa u, nga khaprip ki khmat bad nga duwai. Katba ki wan hajan ka trok, ngam shym la nud ban khih wat tang i shympriah kti. Nga sheptieng ba ïoh ki siat lang ïa nga. Ngam shym la pyrsad mynsiem bad nga shong beit hajuh tad haduh ba ki la leit noh na kane ka jaka. Nga peit siar bad nga ïohi ba ka trok shipai ka la leit phai noh. Hadien ba ki la leit, nga mih ban wad jingïarap na ki shnong ba marjan,” la ong u nongbud trok.
Haba kylli balei ki shipai BSF ki la pyllait suloi ïa ka trok jong ki, na ka liang u heh pulit u la ïathuh, “Ngim pat tip ïa ka daw trai kat haduh mynta. Ngi la ïoh jingtip shaphang kane naduh mynnin miet ha ka por kumba 12:30 mynstep bad kumta hi mar mar, na ka liang ka kynhun pulit ki la leit sha katei ka jaka. Ki pulit ki dang tohkit ïa kane haduh mynta.”
Na ka liang u Rangbah Shnong ka Jalynteng Nongkynrih, u la pynrem jur ïa kane ka kam da kaba ong ba kane ka la dei ka jingpyn ïap dusmon da ki briew ba don ha ka uniphorm.
“Lada ha kano kano ka bynta, utei u rangbah u la kum ïaid lait na ka aiñ, ki la dei ban bat bad kem ïa u, bad ym ban shu shim ïa ka aiñ ha kti jong ki da kaba ki shim syndon ïa ka mynsiem jong u briew. Kane ka long kabym lah ban pdiang. Ngi dawa ba dei ban shimkhia halor kane ka jingleh jong kito kiba donkti,” u la ong.
Shuh shuh, u la ong ba une u rangbah ba la khlad noh u don ïa i khun ba dang 3 bnai bad u dei u nongbsa jong ka ïing. “Ngi dawa ban pynïoh bai lutksan na ka sorkar bad na ki shipai BSF bad ngi kwah ruh ba ka tnad kam poh ïing kan pynthikna ba kine ki briew ki ba dei ban ïada ïa u pud u sam kim dei ban shim ïa ka aiñ ha kti lajong khnang ban pyllait na kano kano ka jingjia ba kum kane,” u la bynrap.
