MAWKYRWAT:
U Deputy Commissioner ka South West Khasi Hills District u Bah T. Lyngwa, ha ka 2 tarik Jylliew u la bthah ïa ki nongot doh ha kine ki thaiñ ba kim bit ban shohdoh ïa ki masi ki ba don ïa ka jingpang Lumpy Skin Disease.
Na ka liang u DC ka SWKHD u la lum ïa ka jingïalang bad ki nongshohdoh ha ryngkat ki Doctor Veterinary ban ïakren halor kane ka bynta.
Haba kren sha ki lad pathai khubor u Bah Lyngwa u la ong ha ka ne ka jingïalang la ïakren halor ka jingpang ki masi ka ba la tip kum ka Lumpy Skin Disease.
“Na ka liang ki doctor, ki la pyntip ba kane ka jingpang ka la ktah ha ki 63 tylli ki shnong ha South West Khasi Hills District bad 5 tylli ki masi ki la ïap na kane ka jingpang, hynrei kane ka jingpang kan ym bit sha ki briew hynrei ka shu ïabit para masi”, u la ong.
“Ha kane ka jingïalang, ngi la bthah ïa ki nongshoh doh masi ba kim dei ban ot ïa ki masi ki ba don kane ka jingpang bad lada lap ba ki don ïa kane ka jingpang ki dei ban pyntip sha ki doctor”, u la bynrap.
Kumba ka long mynta hi ïa kane ka jingpang, lah ban sumar bad pynkhiah tang hapoh ka lai taiew bad na ka liang ki doctot ka Veterinary ki la leit ban ïakynduh ïa ki nongri masi bad bthah ba donkam ban ai tika ban ïada ïa ki masi ki bym pat bit kane ka jingpang”.
U DC u la ïathuh ruh ba kam shem la don kano kano ka jingkhang ïa ki nongdie ïa ka dohmasi ha kane ka thaiñ hynrei kim dei pat ban ot bad die ïa ki masi ba don ïa kane ka jingpang.
