SHILLONG:
U President rangbah ka NPP u Conrad K Sangma u la ong ba ka long kaba shai ba un ïakhun beit na South Tura, kaba dei ka konstitwensi jong u bad kam don kano kano ban kylla hynrei lada don eiei kan shong ha ka party.
Haba kren sha ki lad pathai khubor, u Conrad Sangma u la ong, “Ka long kaba shai ba ngan ïakhun beit na South Tura haduh mynta ka khyllip mat, bad kam don eiei ka jingkylla na ka konstitwensi jong nga. Hynrei lada don eiei ka jingkylla, kan shong ha ka Party, bad lada ki nongïalam ka party ki ong ba hap ban leh ïa kano kano, kata ngin hap ban pyrkhat”.
Kane ka jingong u President ka NPP uba dei ruh u Myntri Rangbah ka jylla ka long hadien ba ka la mih ka jingsawa shane shatai ba u lah ban ïakhun na ki ar tylli ki konstitwensi, kynthup na South Tura bad na Selsella.
Na South Tura un hap ban iakhun ia u kyrtong ka BJP uba dei ruh u MDC u Bernard Marak katba na Selsella, ka MLA ka NPP ka Ferlin CA Sangma ka la phet noh na NPP bad rung sha ka BJP. Ka jingphet ka Ferlin na ka NPP, ka la pynartatien ba ka lah ban ym ïoh tiket shuh hadien ba u Conrad u lah ban ïakhun hi na katei ka konstitwensi kaba u la jop teng ha ki snem ba la leit.
“Haduh mynta ka kynta ba nga don hangne, ngan iakhun beit na South Tura, kan ym don ka jingkylla, hynrei lada don eiei ka jingkylla, ailad ba ngin ïakren ha ka party”, la bynrap u Conrad haba kren sha ki nongthoh khubor ha kane ka sngi Saitjain ha ophis ka NPP, Shillong.
