SHILLONG:
U general secretary ka Khun Hynniewtrep National Awakening Movement (KHNAM), u Bah Thomas Passah ha ka 19 tarik Jymmang, u la ong ba ka jingpynthymmai ïa ka State Reservation Policy (SRP) ka dei man ka 15 snem naduh ba sdang ban pyntreikam ïa ka, hynrei haduh kane ka kynti ym pat don ka jingpynthymmai ïa kane.
Haba kren sha ki lad pathai khubor, u Bah Thomas u la ong, “Mynta la 51 snem lynter hynrei kam pat don ka jingbishar biang ïa ka reservation policy. Lada ka sorkar ka kynran dien ban ïakren halor ka SRP, ka long kabym ïahap. Ka jinglong jingman ha u snem 1972 mynshuwa bad ka jinglong jingman mynta ka la ïapher, bad lada ngi bud katkum ka SRP te nga kwah ban kylli balei ki Khasi – Jaiñtia ki ïoh 40 % reservation bad ki Garo ki ïoh 40 % reservation. La buh ïa kane ka juh ka jingkylli da u Myntri Rangbah ka jylla jong ngi ha ka 28 tarik Kyllalyngkot jong u snem 1972.”
Haba kdew ba ka reservation ka dei ban bhah katkum ka jingbun paid, u Bah Thomas u la ong ba kane ka long ka jingshisha bym buh ha jingmut ba ka jingbun paid ka kham heh ha Khasi – Jaiñtia.
“Hynrei ka jingpynksan ka long katkum ka sorkar, ki don duna bha ki Garo kiba trei ha ki tnad bapher bapher, na kata ka daw ka la ai mar 40-40. Lada ka roster system ka pynthikna ban don ki Garo bad ki Khasi – Jaiñtia mar ryngkat ha ki tnad sorkar bapher bapher kamut ngi donkam ban pynkylla noh ïa ka jingbuh 40 – 40,” u la ong.
U la kdew ba ka jingai mar 40-40 ka long namar ba ki jaitbynriew Garo ki duna bha, hynrei ka roster system kan pynthikna ïa ka jingïoh ryngkat lang ki Garo, kumta donkam ka jingkhmih shuwa ïa ka reservation policy.
“Ka jingbhah mar 40-40 ka long kaba la pynbeit, mynta to ngin bishar sa ïa ka jingbun paid bad pynkylla ïa ka jingai bhah bad kadei kumta ba donkam ban leh. Kumta, ngi donkam ban ïa kren shuh shuh halor ka SRP,” u la ong.
