SHILLONG:
U President ka Khasi Students’ Union (KSU) u bah Lambokstarwell Marngar u la ong ba ka seng kan ym shong thait ban buddien ïa ka jingdawa halor ka Inner Line Permit (ILP), ym tang na ka sorkar jylla hynrei wat ban pynsngew sha ka sorkar pdeng ruh.
Haba kren sha ki lad pathai khubor u bah Marngar u la ong ba naduh ba ka ingdorbar thawaiñ ka la dep ban pdiang ïa ka resolution, ka seng ka la leh ïa ka kamram da ka ba ïaid buddien bad thoh sha u Myntri rangbah duh ka Ri, haman ba wan ki myntri ka Sorkar Pdeng,ka ju ïaid pynkynmaw hynrei ngim tip haduh mynta kane ka dang sahteng,kumta mynta ka sngi ka la shim ïa ka rai ba kan dang wad da ka wei ka lad ka lynti ban lah ban pynurlong ïa kane”.
“Ha ka ba ïadei bad ka ILP ha ka jylla, ka juh ka party ki juh ki briew kiba ïalam ïa ka sorkar, bad kin ym lah ban thet kti ban ong ba ngim tip eiei, hap ban kylli kaei ka ba ki dei ban leh, ka sorkar ka dei ban pynthikna ban shimkhia ym ban shu pyntngen kumne”u la ong.
U la bynrap shuh shuh “Ka don kane ka hamsaïa ka ba ngim pat ïoh ïa ka jingtip ba bniah, ba ki juh ki briew ki ba la pdiang ïa ka resolution ha u snem 2019, bad ki juh ki briew ki leit sha Delhi, ki ong ym long hynrei halor kane ka seng kam pat don ki sakhi satar ba biang,ynda ka la don kan sa sei mano kita”.
U bah Marngar u la ong shuh shuh ba “mynta kan shong ha ki nongmihkhmat ki ba ki paidbah ki la jied, ynnai ïa leh politik halor ka mat ILP namar ïoh wan ka niuma,da ka jingïaid lynti jong ki khun samla, bad ka sorkar kan shim ïa ka jingkitkhlieh”.
U la bynrap shuh shuh, “Halor ka jingwanrah ïa ka lynti rel u la ong ba dei ban pyntreikam shwa ïa ka ILP ka seng kan sa ïaid shakhmat ban ïatai halor ka jingwanrah ïa ka lynti rel la ngi pdiang ne em ïa kane.
U bah Marngar u la ong shuh shuh ba halor ka jingpynbeit ïa u pud u sam, ka seng ka la bud dien ïa kane ka mat, hadien ba la don ka jingpynpaw ïa ka jingbym hun ki nongshong shnong ïa ka jingduh ïa ki ba bun ki jaka , bad namar ba mynta ka juh ka sorkar ka la wan biang kumta ka seng kan dang bud dien ïa kane”.
Ha u bnai ban wan 6 tarik u Jymmang, ka seng kan sa pynlong ïa ka jingïalang ban jied ïa ki nongmihkhmat ba thymmai ban pynkhamti ïa kine ki kam ha ki nongïalam thymmai.
