SHILLONG:
U Myntri Rangbah ka Jylla Conrad K Sangma, u la pyntip ba halor ka jingdawa kiwei pat ki riewlum ritpaid halor ka jingkyntiew ïa ka bhah thungkam na ka 5% sha ka 15% ha ka jylla, ka sorkar kan aiti ban bishar ïa kane ka jingdawa ha ka Committee ki seng saiñpyrthei bad ka Expert Committee ka ban sa thaw shen.
“Na ka liang kiwei pat ki ritpaid riewlum ki ba don ha ka jylla, ki la wan ban ïa kynduh ïa nga ban ai ka dorkhas halor ka jingdawa ban ai 15 % na ka bhah thungkam na ka bynta jong ki,nga la dep ban ïathuh sha ki ba ïa kane ka dorkhas, ka Sorkar kan sa aiti sha ka Commitee bad sha ka Expert Committee ka ban sa thaw shen khang ba kin bishar halor kane bad kin sa pynsngew sha ka sorkar halor kane”.
Lah ban kdew hangne ba ha ka 22 tarik Jylliew, ki riewlum ritpaid ki ba don hapoh ka shatri jong ka Meghalaya Indigenous Minority Tribes (MIMT) ki la wan ban ïakynduh ïa u Myntri Rangbah, u Conrad K Sangma ban dawa ban pynkiew ïa ka bhah thungkam kaba mynta ki ïoh tang 5%. Kine ki riewlum ritpaid ki kynthup ïa ki jaitbynriew kum ka Hajong,ka Koch, ka Rabha, Boro-Kachari bad ki Mann.
Ïa ka ne ka dorkhas la soi da ka Meghalaya Hajong Welfare Association, ka Meghalaya Rabha Jatio Sewa Sangha, ka Meghalaya Koch Association, ka Meghalaya Boro Sahitya Sabha bad ka All Mann Tai Speaking Welfare Association.
Ha ka dorkhas ka ba na ka liang ka MIMT ka la phah sha u Myntri Rangbah ka jylla, ka long ban kyntu ïa ka sorkar ba kan bishar halor ka jingpynkiew noh ïa ka bhah thungkam jong ki na ka 5% sha ka 15 % halor ka nongrim ba ka bhah thungkam ka ba don mynta ka dei ka ba hap ban ïasam lang bad ki Schedule caste.
La da phai sha ka bhah thungkam ha ka jylla lane ka Job Reservation Policy, ka kynthup ïa ka 40% na ka bynta ki jaitbynriew Khasi bad Jaiñtia, 40% na ka bynta ki jaitbynriew Garo, 15% ïa ki General bad 5% na ka bynat ki OT bad ki Schedule Caste.
