SHILLONG:
Ka myntri ka tnat ka koit ka khiah ka Sorkar Jylla ka Kong Ampareen Lyngdoh ka la bthah ïa ka North Eastern Indira Gandhi Regional Institute of Health and Medical Sciences (NEIGRIHMS) ban aiti ïa ka kaiphod halor ka jingkhlad ka samla ha kane ka hospital.
Na ka liang ka Myntri ka la phah ïa ka khubor sngewlem sha ki bahaïing hasem jong ka samla Ranisha Syiemlieh kaba la khlad noh ha kane ka jaka sumar.
Lah ban kdew hangne ba na liang ki ba haïing jong ka samla Ranisha Syiemlieh ki la kynnoh ba ka jingkhlad kane ka samla ka dei na ka jingleh torti ki nongsumar ka NEIGRIHMS Hospital bad ïa kane la lap na ki jingthoh ba kane ka samla ka la thoh katba ka dang don ha ICU kiba kdew ïa ka jingbym sumar hok ki nongsumar ha kane ka Hospital.
