SHILLONG:
U Secretary ka Harijan Panchayat Committee (HPC), u Gurjit Singh, ha ka 21 tarik Ïaïong u la ong ba ka Sorkar Meghalaya Democratic Alliance (MDA 2.0), ka la shu pynbiej ïa ki nongshong shnong ha ka jylla, ha ka ba ïadei bad ka jingpynkynriah ïa ki jaitbynriew Harijan na Them Ïew Mawlong, da kaba kdew ba ki shu ai kyrwoh ban pynkynriah mynta u bnai Jymmang, hynrei shaei kin pynkynriah, hato ka don ka jaka?
Haba kren bad ki ladpathai khubor, u Gurjit Singh u la ong, “Ka blueprint ka ba ka sorkar ka la tyrwa ïa ngi la kdew ba kin pynshna da ka building ka ba 7 mala hynrei ha kane ka jingtyrwa don bun ki jingduna, wat ka jaka ruh kim shai, namar ha ka blueprint ki kdew ba kin ai ha Bishop Cotton Road ha ka jaka ba don ka ophis Municipal, hynrei hangto ka don ka quarter, kaba ki nongtrei na ki tnad bapher bapher ki dang sah”.
U la bynrap shuh shuh da kaba ong,“kumno ka sorkar kan leh ïa kane ka jaka ka ba dang dap da ki nongtrei sorkar, shwa ba kin pynkynriah ïa ngi, kin hap ban pynkynriah shwa ïa ki bad kin sa pynpra ïa kine ki jaka sah bad kin sa sdang ban shna hynrei kin ong mynta u bnai Jymmang kin pynkynriah noh haei kin pynkynriah? Ïa ki paidbah ki la shu pynbiej, bad naduh ba la thaw biang ïa ka sorkar thymmai ki la shu ai kyrwoh tang ban pynbiej ïa u paidbah”.
U Singh u la ong shuh shuh, “Kane ka mat ka dei ka ba dang don hapoh ka ïingbishar ka don ha Supreme Court, bad ha High Court ar tylli ki mokutduma ki don lada ka sorkar kam lah ban leh eiei halor kane ka bynta, ruh kane ka mokutduma ka dang don ha ïingbishar hi”.
“Katkum ka jingong ka sorkar ba kan pynkynriah ïa baroh 342 longïing ki ba sah ha Them Ïew Mawlong, wat la ki don na ki katto katne ki kynhun ki ba ju kynthoh ha rukom hynrei kine kim shongkhia eiei namar ka ba donkam ka long ban don ka jingïakren na ka liang ka ain, na ka liang ki briew sorkar bad ban shim rai maki kan long hynrei te ym dei ban sngap ïa ki nongkynthoh”, u la bynrap.
“Halor ka Blueprint ngi la dep bishar, bad pynsngew ruh sha ki nongshong shnong ha kane ka jaka bad shim rai ba ngim pdiang, kumta ngi la dep ban pynsngew ïa kane bad kan shong ha ka sorkar ba kan leh kumno? La kin khot ne kin ym khot ban ïakren halor kane. Hynrei ngi long ki ba kloi ban ïakren namar kano kano ka jingeh, tang lyngba ka jingïakren hi ka ba lah ban weng”, la ong u nongïalam ka Harijan.
U Singh u la ong ruh, “Ka HPC ka la buh hakhmat ka Sorkar ïa ki 8 tylli ki jingdawa hynrei ka wei ruh na ki jingdawa ka sorkar ka khlem pdiang, kumta ngin ym lah ban pdiang ïa ka blueprint bad ki 8 tylli ki mat jingdawa haduh mynta hi ngi dang ïeng ha ka juh ka nongrim, bad kaei ka ba ngi la dawa ngi skhem ha kata”.
“Kane ka jingeh ka dei ka ba la rim bha, la dei ban pynbeit noh hynrei ban shu pynduh ïa ka kamai ka jih ban shu kyrngah ban ym ai NOC na ka bynta ka ring bording electric, ban ym ai um bam um dih te ka long ka ba bakla, ki dei ban pynbeit da ka rukom ka ba dei, ym ban shu ñion beiñ ïa ngi”, u la bynrap.
U Gurjit Singh u la ong ba ka dei ban don ka jingïakren ka ba beit ban ïoh ïa ka rai ka ba ïa biang lang bad kumba ka long mynta ki la shu ïakren tang ha ki lad pathai khubor bad phah ïa ka blueprint, wat ka ïingbishar ruh ka la btah ba dei ban don ka jingïakren hynrei haba ka HPC ka la ïakren, kawei ruh ka mat jingdawa ki khlem treh ban pdiang, te kan myntoi aiu ban ïakren?
Halor ka jingkhang ïa ka surok, u Singh u la ong “Naduh ba ki la khang ïa kane ka jaka ngi la ai jingmut ba ki dei ban plie noh, namar ki paidbah ki shem jingeh na ka jingdheng kali, hynrei kim sngap”.
