SHILLONG:
U Myntri Rangbah ka jylla u Conrad K Sangma u la ong wat la ka jingtwa ka kynroh jong ka PA Sangma Stadium kan dei ka jingjia ka ba heh hynrei ban wanrah ïa ka jingshngaiñ ka Sorkar ka la dep bthah ban thung da ka Magisterial Enquiry.
Ha ba kren sha ki ladpathai khubor u Conrad u la ong “Ban ujor da ka ejahar halor kane ka mat ngim da sngewdonkam, namar ngi la bthah ban thung da ka Magisterial Enquiry bad katkum ka jingtohkit ka ba mardor ka kren shai halor kane, ki dei ban sngewthuh ba ka stadium hi baroh kawei kam shem la don kano kano ka jingjulor bad ka long ka ba shngaiñ laitnoh tang ka bynta ka ba ka um na u slap ka la ïoh ban lang na ka daw ba sahkut ka nala bad pynlong ban synjor bad khyllem kane ka kynroh”.
U la bynrap shuh shuh, “Ha kane ka madan ka la don ka kynroh ruh ka ba jrong 40 meter hynrei ka ba la twa ka dei tang ka kynroh ka ba don 10 meter, bad kine ki jingshna ha ka stadium ki skhem bad ki khlem don kano kano ka jingshah ktah”.
U Myntri Rangbah u la ong shuh shuh, “Hynrei na ka liang ka sorkar kan ym kheiñ sting ïa kane kumta ngi la bthah ba buh da ka Magisterial Enquiry, khnang ban pyntikna ba kan ym don shuh kum kane ka jingjia, bad ka sorkar kan sa bishar ïa ka kaiphod jong kane ka jingtohkit bad kan sa shim ka rai ba ngin leh kumno”.
“Na ka liang ka sorkar lada ka sngew donkam, hadien ba la ïoh ïa ka kaiphod jingtohkit kan sa buh ruh ïa ka Safety Audit ban pynlong ïa ka jingjurip ban pynthikna ïa ka jingshngaiñ kane ka madan”, la ong u Myntri Rangbah.
Lah ban kdew hangne ba ka shibynta jong ka kynroh na ka Purno Sangma Stadium ka ba la plie ha ka 16 tarik Nohprah 2022 ka la twa noh ha ka 22 tarik jylliew 2023 na ka jingther lynter u slap.
