SHILLONG:
U General Secretary ka United Democratic Party (UDP)u Bah Jemino Mawthoh u la ïathuh ba ka Central Executive Committee ka UDP ka la ïathir ïatai bha halor ki 8 tylli ki mat ban ai jingmut sha ka Committee ka ba la khlieh da ka Dr Ampareen Lyngdoh halor ka Reservation Policy bad Roster System.
“Ha ka jingïalang jong ka CEC, ngi la ïatai ïa thir halor ki 8 tylli ki mat halor ka Reservation Policy bad ka Roster System, kum ba phi la tip ba na ka liang ka sorkar ka la thaw ïa ka Committee kyrpang ban shim ïa ki jingaijingmut na ki saiñpyrthei bad ym tang kiwei ki kynhun ki ba la kwah ban khmih bniah, ngi ruh ngi la ïatai ban phah ïa ka jingai jingmut jong ngi”, u la ong.
U la bynrap “Kum ka party ngi la ïashong 12 -13 sien ïa ka jingïalang ban ïatai ïathir bad ai jingmut halor ka Reservation Policy ka ba khlem lah ban bishar la 51 snem bad ka party ka la shim ruh ïa ka jingai jingmut na ki riewshemphang, ha ka ba ïadei bad ka jingpynwandur khang ba kan ym don kano kano ka jingktah ïa kino kino ki jaitbynriew ki ba don ha ka jylla”.
U la ong shuh shuh “Ïa kine ki jingai jingmut ngin sa aiti sha ka Committee ba la khlieh da ka Kong Ampareen Lyngdoh, hynrei ha shwa ban phah sha kane, ha ka ne ka jingïalang la ïatai bad bthah ïa ka Core Committee ba kan bsut ïa kine ki jingai jingmut na ka party”.
Na ka liang ka party ha ki ar lane lai sngi kan sa leit ban aiti sha ka Committee ïa ka jingai jingmut na ka liang ka UDP halor ka Reservation bad Roster.
U Bah Jemino u la ïathuh shuh shuh, ha kane ka jingïalang la ïakren ruh halor ka jingdonkam ban ban pynkylla ïa ka constitution jong ka party, ha shwa ban poi ka General Council ka ban long ha ka 29 tarik u Naitung 2023.
“Ka samoi trei kam ki nongkitkam ka UDP ka la kut hynrei na ka jingwan u Covid ka la don ka jingpynjlan ïa ka samoi treikam hynrei bad mynta na ka liang ka party ka la don ka jingtyrwa ban pynkylla ïa ki katto katne ki mat ha ka Constitution”.
“Mynta ka sngi ngi la jied ruh ïa ki dkhot jong ka Nomination Committee, kiban long ki nong peit ban khmih ïa ka jingjied ïa ki dkhot nongkitkam ba thymmai ka UDP ha kylleng ka jylla Meghalaya” u la bynrap.
