SHILLONG:
Hadien khyndiat sngi ba ka myntri ba khlieh ïa ka Committee on Reservation and Roster ka Kong Ampareen Lyngdoh ka la ong ba haduh mynta ym pat don na ka liang ki seng saiñpyrthei ban wan ai jingmut halor ka Reservation, na ka liang ka United Democratic Party (UDP) ha ka 14 tarik Naitung ka la leit ban ïakynduh ïa kane ka Chairperson ban ai ïa ki phra tylli ki jingai jingmut jong ka seng halor ka Reservation.
Haba kren bad ki nongthoh khubor mynta ka sngi, na ka liang u Dr Jemino Mawthoh uba dei uwei na ki nongïalam ka UDP u la ong ba dei hadien ka jingshong jingïalang ba khatsaw sien ba ki sa lah ban wanrah ïa kane ka jingai jingmut sha ka Kong Ampareen halor ka Reservation bad ba kan ym ktah ïano ïano.
“Khatduh khatwai na ka liang jong ngi, ngi la ioh ban ïakynduh ïa ka Kong Dr Ampareen halor ka jingai jingmut halor ka Reservation Policy bad ka Roster System bad na ka liang jong ka ruh ka la pynpaw ïa ka jingsngewkmen”, la ïathuh u Dr Jemino bad bynrap ruh ba na ka liang ka Kong Ampareen ka la pyntip sha ki ba ki dei ka seng saiñpyrthei kaba nyngkong ban wanrah ïa kine ki jingai jingmut.
Na ka liang u Dr Jemino u la ïathuh ruh ba na ka liang ka seng ki la buh phra tylli ki mat ha kaba na ka liang ka Chairperson kan sa rah sha ka Expert Committee. “Ka shong pat ha ka Expert Committee ban peit bniah ïa kine ki jingai jingmut na ka liang ka party jong ngi”, la bynrap u Dr Jemino.
Halor kine ki phra tylli ki mat ba kum ka seng ka la leit ai ha ka Chairperson ka Committee on Reservation and Roster, na ka liang ka UDP ka la ïathuh ba kam lah ban pynpaw paidbah namar na ka liang ka Chairperson ka la ong ba hap ban ap shwa sa na kiwei pat ki seng saiñpyrthei bad ruh ba kane ka kam hap ban peit shwa da ka Expert Committee.
Hynrei na ka liang u Dr Jemino u la ai ksai ba kane ka jingai jingmut ka seng ka dei kaba la pynwan dur bha khnang ba kan ym ktah ïano ïano. “Ngi hap ban sngewthuh ïa kane kawei ngi la don lang bad ki Garo naduh ka jingïakhih Hill State naduh u snem 1972 bad ngi la ïa im lang ha kane ka jylla ha ki 51 tylli ki snem. Haba ngi khmih biang ruh kam mut ba kan ktah ïa kano kano ka jaitbynriew ha kane ka jylla jong ngi”, la bynrap u Dr Jemino.
U la ïathuh ruh ba na ka liang kum ka seng ka la pyrshang ban pynwandur ïa kane ka jingai jingmut ban wanrah ïa ka jingbha “Na ka bynta ki jaitbynriew rit paid bapher bapher kiba don ha kane ka jylla jong ngi”. U la ïathuh ruh ba ka seng kam kwah ba kan don ka jingshah liang ïa kano kano ka jaitbynriew.
“Ngi sngewkhia na ka bynta ki samla wad kam wad jam bad ka jingkyrduh kam. Na ka liang jong ngi ngi la kren ruh ban thaw shuh kiwei pat ki lad ban iohkam iohjam ki khun samla”, la bynrap shuh shuh u Dr Jemino.
U Dr Jemino u la ïathuh khyndiat ruh halor ka mat ba ka seng ka la ai ha ka Chairperson bad kata ka long ban pyrkhat kyrpang ïa kiba wan na ka longiing longsem kaba duk ba jynjar.
Na ka liang ka seng ka la ong ba watla ka sorkar kan jied da ki riewstad kiba tbit halor kane ka kam, hynrei ka ai jingmut ba donkam ban pynrung ïa ki stad kiba na ka jylla lajong. “Donkam ban pynrung ïa ki expert na ka jylla jong ngi, namar ki don kiba kham sngewthuh janai halor kane ka Reservation Policy. Ngi kiba lah shong lah sah hangne ngi kham tip ïa ka jinglong jingman ha ka jylla”, la bynrap u Dr Jemino.
