MAWKYRWAT:
Ka ophis jong ka District Legal Service Authority (DLSA), South West Khasi Hills District ryngkat ka jingïatreilang bad ka ophis u Divisional Forest Officer, Social Forestry & Territorial Division, West & South West Khasi Hills ha ka 8 tarik Jylliew ki la rakhe ïa ka sngi burom ia ka mei mariang ne ka World Environment Day halor ka phang, “Beat Plastic Pollution”, ba la pynlong hapoh ka Conference Hall jong ka District & Session Judge, Mawkyrwat.
Kiba la wan ia shim bynta ha kane ka jingrakhe ki long naduh ki nongtrei jong ka District Court & Session Judge, Mawkyr-wat, ki nongtrei napoh ka Forest Department, Maw-kyrwat Division naduh u bah M.J. Kharbuddon, MFS, Assistant Conservator of Forests, Mawkyrwat bad kumjuh ruh na ka liang jong ki Syiem ha kaba la wan ban mih khmat da u Pa’iem Nangtei S. Syiemiong uba dei u Syiem jong ka Hima Langrin.
Haba kren maitphang halor kane ka jingrakhe bad ia ka phang pdeng, ka kong D. Sohtun, Chief Judicial Magistrate (CJM)-cum-Secretary District Legal Service Authority (DLSA), South West Khasi Hills District pashat ïa ki katto katne ki mat jingdonkam ba kum ki paidbah kin hap ban pynduna ïa ka jingpyndon-kam ïa ki plastik namar ki plastik ha kine ki sngi ki la nang kharoi katba shaba phai kata ha ki lynti ki synkien, ki rud ki kiar bad ki jaka ïew ruh. Namarkata, ka la ai jingmut ba lada kwah ban pynduna ïa ka jingpyn-donkam ïa ka plastik, ka la ai nuksa ba haba leit ban thied jingthied sha ïew kum ki briew ki dei ban rah hi noh da ka pla la jong ym shuh ban da pan da ki plastik ban song ïa ki tiar ba ki ki thied.
“Watla ka la don ka jingkhang ne jingmana na ka sorkar ha kaba ïadei bad ka jingpyndonkam ïa ki plastik, hynrei haduh mynta ym pat lah ban leh eiei”, ong ka Kong Sohtun, kumta ka dei ka kamram jong ngi iwei pa iwei ba kin long kiba phikir ne kiba lah ban tehlakam ïa ka jingpyndon-kam ia ki plastik khnang ban lait na ki jingpynjaboh ïa ka mei mariang bad ïa ki sawdong ki sawkun. Ha kajuh ka por la pynkynmaw ruh ïa ki katto katne ki Article hapoh jong ka Ri India kiba la buh ïa ki katto katne ki mat halor kumno ban ai jingïada bad jingsumar ïa ka mei mariang.
U Dr. G.H. Chyrmang, MFS, Divisional Forest Officer, Social Forestry & Territorial Division, West & South West Khasi Hills District ha ka jingkren jong u, u la pashat ïa ki bynta kiba don ha ka Meghalaya Forest Regulation (Application & Amendment) Act, 1973, Meghalaya Act 9 jong ka 1973 bad kumjuh ïa ka Meghalaya Forest Regulation (Amendment Act) 2021 ba ki paidbah ki dei ban tip bad ruh ïa ki katto katne ki Section kiba don ki aiñ ban kem ryngkat ka jingdaiñ kuna ïa ki briew kiba pynjot dusmon ïa ki sawdong sawkun ne wat kiba pynïap dusmon ïa ki jingthaw ba im khlem da leh katkum ki jingdonkam jong ki.
Shuh shuh u la ban ba ka sorkar jylla ka la pyntip lyngba ka Official Gazette ha kaba ka la pynkup bor ïa u Forest Officer ban shim kum ka bai buria bad kiwei kiwei bad ban pyllait noh ïa kano kano ka mar lkaba shah bat ne shah knieh lada ki la dep ban siew ïa ka bai buria lada don kino kino ki jingujor pyrshah ïano ïano kiba pynkheiñ ïa ki aiñ khlaw lait noh tang kito ki kam sniew (kam tuh/kamthiem) kiba la pynthikna katkum ka section 62 lane section 63.
Hadien ka jingïalang, la pynbud da ka jingthung dieng ha phyllaw jong ka ophis District & Session Judge, South West Khasi Hills District, Mawkyrwat ha kaba la ïashimbynta lang da baroh kiba la wan ha ka jingïalang.
Ïa ka jingïalang bad ka jingkren khublei la ai da ka Kong D. Sohtun, Chief Judicial Magistrate (CJM)-cum-Secretary District Legal Service Authority (DLSA), South West Khasi Hills District.
